Engar nýjar vísbendingar hafa komið fram er varða hvarf Birnu Brjánsdóttur
Á næstu klukkustund fer af stað skipulögð leit sérhæfðra leitarhópa björgunarsveitanna á svæðinu þar sem Birna Brjánsdóttir sást síðast. Þetta staðfesti Þorsteinn G. Gunnarsson, upplýsinga- og kynningarfulltrúi Slysavarnarfélagsins Landsbjargar í samtali við DV. Lögreglan óskaði fyrst eftir aðstoð björgunarsveitanna við leitina af Birnu í gærkvöldi.
„Öll okkar verkefni eru unnin af beiðni lögreglu. Í gærkvöldi var óskað eftir eftir sporhundum og núna fer þessi leit formlega af stað.“
Í gærkvöldi greindi DV frá því að björgunarsveitarmenn hefðu farið á heimili Birnu með leitarhunda. Þá hafði Ágúst Svansson, aðalvarðstjóri hjá lögreglunni, greint frá því að ekki yrði óskað eftir aðstoð björgunarsveita fyrr en nýjar upplýsingar kæmu fram.
Mikill fjöldi fólks hefur boðið fram aðstoð sína við leitina af Birnu. Þorsteinn kveðst ekki geta svarað því að svo stöddu hvernig almenningur getur aðstoðað við skipulagða leit.
Þá segir Þorsteinn að svæðisstjórnendur björgunarsveita á höfuðborgarsvæðinu hafi unnið með lögreglunni í gærkvöldi og í nótt. Engar nýjar vísbendingar hafa komið fram í málinu. Því verður leitað út frá þeim punkti þar sem Birna sást síðast.
Líkt og fram hefur komið sást Birna í eftirlitsmyndavél ganga ein síns lið austur Austurstræti, Bankastræti og Laugaveg að húsi númer 31. Þar hvarf hún sjónum klukkan 05:25 aðfaranótt 14 janúar.
Leitin að Birnu fór af stað á svæðinu þar sem hún sást síðast í hádeginu. Leitað er 10 til 12 manna hópum. Tugir björgunarsveitarmanna eru í miðborginni.