Ítalir eru elsta þjóð Evrópu ef marka má nýja skýrslu frá frá Hagstofu Evrópusambandsins, Eurostat. Árið 2015 ar 6,5 prósent mannfjöldans á Ítalíu 80 ára eða eldri og er hlutfallið hvergi hærra í Evrópu. Á Íslandi var hlutfallið 3,7 prósent samanborið við 3,1 prósent árið 2005.

The Local á Ítalíu greinir frá þessu. Skýrslan var gefin út í tilefni þess að þann 1. október er dagur aldraðra. Næstelsta þjóð Evrópu, samkvæmt þessari skilgreiningu Evrópsku hagstofunnar, er Grikkland en þegar gögnum var safnað saman á liðnu ári voru 6,3 prósent íbúa þar í landi 80 ára eða eldri. Þar á eftir kom Spánn (5,9 prósent).

Yngstu þjóðir Evrópu af ríkjum Evrópusambandsins eru Írar og Slóvakar þar sem hlutfall íbúa 80 ára og eldri er 3,1 prósent. Í Svartfjallalandi, Makedóníu og Albaníu er þetta hlutfall á bilinu 2,2 prósent til 2,7 prósent.

Í skýrslunni er að finna samanburð áranna 2005 og 2015. Sem fyrr segir hefur hlutfall Íslendinga, 80 ára og eldri, hækkað líkt og í fjölmörgum Evrópuríkjum. Af ríkjum Evrópusambandsins hefur hlutfallið lækkað hjá aðeins einni þjóð, Svíum. Mest hækkaði hlutfallið hjá Grikkjum, eða úr 3,9 prósentum árið 2005 í 6,3 prósent árið 2015.

Þeir sem ná því að verða 80 ára gamlir á Ítalíu geta vænst þess að lifa í áratug til viðbótar, samkvæmt skýrslu Eurostat. Það er örlítið hærra en meðaltalið í öðrum Evrópuríkjum sem er níu ár og sex mánuðir. Frakkar sem ná því að verða 80 ára geta þó vænst þess að lifa lengst allra íbúa Evrópu, eða í 11 ár til viðbótar.

Konur lifa mun lengur en karlar samkvæmt skýrslunni. Fyrir hvern karl sem nær því að verða áttræður eru tvær konur sem ná sama aldri.