Kosið verður til Alþingis 29. október næstkomandi. Leiðtogar ríkisstjórnarinnar lögðu það til við stjórnarandstöðuna, sem tók vel í hugmyndirnar. RÚV greinir frá þessu. Á fundinum voru Sigurður Ingi Jóhannesson forsætisráðherra, Bjarni Benediktsson fjármálaráðherra, Katrín Jakobsdóttir formaður VG, Oddný Harðardóttir formaður Samfylkingarinnar, Birgitta Jónsdóttir Pírati og Óttar Proppé formaður Bjartrar framtíðar.

Þess hefur verið beðið með nokkurri óþreygju að kjördagur verði ákveðinn, en fram að þessu hafði verið uppi óvissa um hvort kosið yrði í haust eða ekki. Sigmundur Davíð Gunnlaugsson, fyrrverandi forsætisráðherra, hefur verið því mótfallinn en við breytingar á ríkisstjórninni snemmsumars var tilkynnt að boðað yrði til kosninga í haust, til að sefa þá óánægju sem uppi var í samfélaginu. Nú hefur kjördagur verið ákveðinn en kosið verður eftir rúmar 11 vikur.

Haft er eftir Bjarna Benediktssyni, fjármálaráðherra og formanni Sjálfstæðisflokksins, að hægt eigi að vera að klára helstu mál á þeim tíma sem til stefnu er. Fjárlagafrumvarp verði ekki lagt fram fyrr en eftir kosningar.

Vísir hefur eftir Birgittu Jónsdóttur að leiðtogar stjórnarflokkanna hafi lagt fram langan lista yfir mál sem þeir vilja að nái í gegn fyrir kosningar. Kosið verði að því gefnu að þingstörfin gangi eðlilega fyrir sig.