Segir nýjasta útspil Sigmundar Davíðs geta sett allt í upplausn
Höskuldur Þórhallsson, þingmaður Framsóknarflokksins, vandar formanni flokksins, Sigmundi Davíð Gunnlaugssyni, ekki kveðjurnar í færslu á Facebook-síðu sinni. Höskuldur segir að það útspil Sigmundar, að ekki sé víst að þingkosningar fari fram í haust, setji ríkisstjórnarsamstarfið í uppnám.
Þingmenn Framsóknarflokksins, til að mynda Sigmundur Davíð og Gunnar Bragi Sveinsson, hafa báðir sagt að klára þurfi ákveðin mál í þinginu áður en til kosninga kemur. Takist það ekki verði ekkert úr því að kosið verði. Þessu er Höskuldur ósammála og segir hann ekki koma annað til greina en að standa við það samkomulag sem gert var í vor.
„Í kjölfar bréfs formanns Framsóknarflokksins til félagsmanna hafa á ný kviknað efasemdir um það hvort kosningar verði haldnar í haust eða ekki. Í kjölfar Panamaskjalanna þar sem upplýst var um spillingu, leynd, skattsvik fjölmargra einstaklinga, sagði þáverandi forsætisráðherra af sér. Í kjölfarið samþykkti þingflokkur Framsóknarflokksins það skilyrði Sjálfstæðismanna að kosningar yrðu haldnar í haust gegn því að Sjálfstæðisflokkurinn féllist á að Framsóknarflokkurinn skipaði áfram forsætisráðherra úr sínum röðum. Á það féllst Sjálfstæðisflokkurinn og Sigurður Ingi Jóhannsson tók við af formanni flokksins. Þetta skilyrði setti þingflokkur framsóknarmanna ekki síst til að tryggja að unnt væri að halda áfram vinnu við og klára mikilvæg mál á borð við húsnæðisfrumvörp, afnám hafta, mikilvægar samgöngubætur auk fleiri mála sem listuð voru upp í samkomulaginu,“ segir Höskuldur í færslunni.
Hann segir að Framsóknarflokkurinn hafi unnið í samræmi við þetta og hann hafi að minnsta kosti litið svo á að ekki komið annað til greina en að standa við samkomulagið sem gert var. Höskuldur segist ekki vera einn um þessa skoðun í þingflokknum og bendir hann á ummæli Sigurðar Inga Jóhannssonar forsætisráðherra um að hann væri maður orða sinna.
„Ég dreg þá ályktun að nýjasta atburðarásin sé forsætisráðherra mjög á móti skapi. Nýjasta útspil formanns flokksins er að mínu mati til þess eins fallið að koma í veg fyrir þá mikilvægu vinnu sem fram undan er í þinginu og setja þar allt í upplausn. Slíkt myndi einnig sprengja ríkisstjórnina og þar með færu mörg mál í súginn,“ segir Höskuldur.