Vantrú, félag trúleysingja, gagnrýnir Kvennablaðið harðlega fyrir að auglýsa komu heilara til landsins. Í auglýsingu Kvennablaðsins segir að Shaman Durek, andlegur leiðbeinandi og hæfileikaríkur heilari, komi til Íslands í þriðja sinn og býður einkatíma frá 2. til 12. febrúar. Verðið fyrir einkatíma er 45.500 krónur.
Durek þessi segist hafa læknað krabbamein, bjargað fólki úr dái ásamt ýmsu öðru. Í umfjöllun Kvennablaðsins er Durek sagður eftirsóttur fyrirlesari og kennari og er með fastan dálk í Huffington Post.
Vantrú segir að Kvennablaðið hafi staðið sig sæmilega í umfjöllun um hindurvitni en þó stundum birt vafasamar lífstílsgreinar
„Þessi umfjöllun um heilarann sem læknar krabbamein er þó miklu verri. Það er satt að segja algjörlega skammarlegt og ritstjórn Kvennablaðsins missir allan trúverðugleika þegar vefurinn auglýsir svona svikahrapp.“
Fyrir neðan umfjöllunina á vef Vantrú er notendum boðið upp á að taka þátt í umræðum. Þar segir: „Sýnið viðbrögð, en vinsamlegast sleppið öllum ærumeiðingum“
Í pistlinum á Vantrú segir ennfremur:
„Því Durek er svikahrappur og skíthæll. Það er eina orðið sem hægt er að nota um þá sem misnota og féfletta sjúklinga. Við vörum fólk sterklega við því að láta plata sig.“