Íslenskt par í haldi í Brasilíu eftir að fíkniefni fundust í fórum þess
Faðir 26 ára íslensks manns heyrði fyrst af því í fjölmiðlum að sonur hans hefði verið handtekinn í Brasilíu eftir að fjögur kíló af fíkniefnum fundust í fórum hans og kærustu hans. Parið var handtekið í Fortaleza í Brasilíu milli jóla og nýárs og situr nú í 30 daga gæsluvarðhaldi. Þau gætu átt 15 ára fangelsi yfir höfði sér.
Þetta kom fram í kvöldfréttum Stöðvar 2. Þar kom fram að faðir mannsins hefði vitað að hann væri í Brasilíu en ekkert hefði heyrst til hans í nokkra daga.
Eins og kom fram í gær var parið með fjögur kíló af kókaíni í fórum sínum. Efnin voru falin í fölskum botnum á þremur ferðatöskum sem þau höfðu meðferðis. Þá fannst einnig kókaín í tveimur smokkum.
Í fréttum Stöðvar 2 var rætt við brasilískan lögfræðing hér á landi, Miriam Guerra Másson, en hún er meðal annars tengiliður brasilískra ríkisborgara hér á landi við sendiráð Brasilíu í Noregi. Miriam sagðist hafa rætt við lögregluna í Fortaleza til að afla upplýsinga um málið og fékk hún þær fréttir að parið sæti nú í 30 daga gæsluvarðhaldi. Dómari getur framlengt gæsluvarðhaldið í aðra 30 daga en innan þess frests verður saksóknari að gefa út ákæru.
Þá sagði Miriam að refsiramminn fyrir fíkniefnasmygl í Brasilíu væri 5-15 ár. Það gæti þó orðið parinu til refsilækkunar að þetta er fyrsta brot þeirra þar í landi.
Miriam sagði að aðbúnaður í gæsluvarðhaldsfangelsum í Brasilíu sé talsvert betri en í almennum fangelsum, en brasilísk fangelsi hafa það orð á sér að vera oft á tíðum yfirfull og þá þykir aðbúnaður fanga slæmur.
„Í fangaklefa sem er ætlaður fyrir einn eða tvo, þar eru kannski fimmtán til tuttugu manns inni. Það er bara því miður skelfilegt ástand þarna,“ sagði Miriam í fréttum Stöðvar 2.