Eiður Smári Guðjohnsen, einn merkasti knattspyrnumaður sem Ísland hefur átt spáir því að íslenska landsliðið fari beint heim eftir riðlakeppnina á Heimsmeistaramótinu í Rússlandi í sumar.

Þetta kom fram í þættinum Andstæðingar Íslands sem Eiður stýrir á RÚV. Eiður fór þá sem gestur í sjónvarpsþátt í Nígeríu.

Ísland er í riðli með Nígeríu, Argentínu og Króatíu á HM. Ísland hefur leik 16 júní gegn Argentínu.

,,Ég spái því að Króatía og Argentína fari áfram,“ sagði Eiður Smári í þættinum en tvö af fjórum liðum komast áfram.

,,Það er leiðinlegt að segja það hér í sjónvarpinu, ég er frá Íslandi og er hér í myndveri í Nígeríu.“

Það er auðvitað ekki von Eiðs að spá hans rætist. ,,Þetta er heiðarleg skoðun mín,“ sagði þessi fyrrum knattspyrnumaður.

Leikmenn íslenska liðsins hafa sett sér það markmið að komast áfram en Ísland er i fyrsta sinn að taka þátt í þessum stærsta íþróttaviðburði í heimi.