Trevor Sinclair segir að það eigi að taka sex stig af Manchester United fyrir það eitt að hafa gert tíu breytingar á byrjunarliði sínu gegn Leicester í gær.
United hafði spilað gegn Aston Villa á sunnudag og mætti svo Leicester í gær, liðið mætir svo Liverpool á fimmtudag. Ástæðan er frestun á leik liðsins við Liverpool sem átti að fara fram fyrir rúmri viku síðan.
Ole Gunnar Solskjær gerði tíu breytingar á liði sínu fyrir leikinn gegn Leicester og tapaði 1-2, tapið kemur sér afar illa fyrir West Ham og Liverpool.
„Ég ætla ekki að gera lítið úr þeim leikmönnum sem tóku þátt en þetta voru tíu breytingar. Þetta var B-liðið þeirra,“ sagði Sinclair.
„Þetta er óvirðing og hefur mikil áhrif á baráttuna um sæti í Meistaradeildinni. Það eru lið sem þjást vegna þess að United gerði lítið úr leiknum. Chelsea, Liverpool, West Ham og Tottenham gætu misst af sæti í Meistaradeildinni vegna þess.“
„Það verður að refsa United, þrjú stig eru ekki næg refsing. Hvernig þeir stilltu upp liði og hvernig félaginu mistókst að tryggja öryggið á vellinum gegn Liverpool. Það á að taka sex stig af Manchester United.“