The Daily Beast greinir frá því að úkraínskur herforingi hafi heldur betur niðurlægt andstæðinga sína í Rússlandi er hann sviðsetti sitt eigið andlát til að sækja fé sem rússnesk stjórnvöld höfðu lagt til höfuðs honum. Að sögn Daily Beast var um að ræða rúmlega 64 milljónir.
Frá þessu greindu stjórnvöld Úkraínu í vikunni.
Um er að ræða öfgahægrimanninn Denis Kapustin sem stofnaði rússnesku sjálfboðaliðasveitirnar RVC sem berjast gegn samlöndum sínum fyrir hönd Úkraínu. Rússar greindu frá því nýlega að Kapustin hefði fallið í loftárás á borgina Zaporizhia þann 27. desember. Kapustin hafði þá lengi verið ofarlega á lista Rússa um eftirlýsta stríðsglæpamenn.
„Við munum hefna þín, Denis,“ skrifaði RVC á samfélagsmiðlinum Telegram og virtust þannig staðfesta að Kapustin væri fallinn. „Arfleifð þín mun lifa.“
Nú er þó komið í ljós að Kapustin er sprelllifandi. Stjórnvöld í Úkraínu ákváðu að sviðsetja dauða hans bæði til að koma fá tækifæri til að koma honum í skjól og til þess að heimta það fé sem hafði verið sett honum til höfuðs í Rússlandi.
Úkraínska leyniþjónustan HUR bauð Kapustin velkominn aftur til lífsins í myndbandi sem var birt á fimmtudaginn. Eins var Kapustin lofaður fyrir að hafa leikið á Rússa.
„Til hamingju með að vera aftur kominn til lífsins. Það er alltaf gleðiefni. Ég er líka glaður að peningarnir sem voru lagðir þér til höfuðs hafa verið notaðir til að hjálpa okkur í baráttunni. Ég óska okkur öllum og þér sérstaklega áframhaldandi velgengni.“
Leiðtogi HR, Kyrylo Budanov, segir að Kapustin sé sérstaklega í nöp við Rússlandsforseta. Þessi brella hafi verið á teikniborðinu mánuðum saman áður en hún kom til framkvæmdar.
Kapustin er hryðjuverkamaður í augum Rússa, en hann hefur lengi verið umdeildur bandamaður Úkraínu vegna tengsla hans við nokkra hópa sem teljast til öfgahægri eða nýnasisma. Evrópa er ekkert sérstaklega hrifin af honum og hefur honum verið meinað að ferðast til flestra ríkja Evrópusambandsins, þar með talið til Þýskalands, Frakklands, Ítalíu og Spánar, frá árinu 2019 vegna öfgafullra skoðana hans.
RVC hafa þvertekið fyrir að vera hópur nýnasista. Hópurinn segist vera íhaldssamur og trúa á hefðbundin gildi. Þeir lýsa sér sem föðurlandsvinum sem vilja koma á nýrri stjórnskipan í Rússlandi þar sem Rússar geti lifað í friði við nágranna sína.
„Þú munt aldrei sjá mig veifa fána með hakakrossi og þú munt aldrei sjá mig lyfta hendinni til að framkvæma Hitler-kveðjuna. Hvers vegna mynduð þið kalla mig þetta?“ spurði Kapustin blaðamann Al Jazeera árið 2023.
