Á síðustu tveimur mánuðum hefur alls 41 ungur karlmaður látið lífið í Suður-Afríku vegna afleiðinga sérstakra athafna sem fela meðal annars í sér umskurð sem orðið hefur öllum þessum ungu mönnum að aldurtila.
Greint er frá þessu í fréttum ABC en um er að ræða hefðbundnar manndómsvígsluathafnir í helstu þjóðernishópunum sem flestir svartir íbúar Suður-Afríku tilheyra, svo sem Xhosa, Ndebele, Sotho og Venda.
Ungu mennirnir eru í aðdraganda athafnanna settir í sérstaka skóla þar sem þeim eru kennd hefðbundin gildi og um þá ábyrgð sem þeim er ætlað að bera sem fullorðnir karlmenn. Umskurðurinn er síðan hluti af þessu ferli og á hverju ári eru dauðsföll af þesssum völdum. Samkvæmt lögum eiga svona skólar að vera skráðir hjá ríkinu en alltaf spretta upp óskráðir skólar og það er helst í þeim sem dauðsföll verða vegna umskurðarins.
Í skráðum skólunum eru rukkuð skólagjöld sem ýtir undir að ólöglegum skólum sé komið á fót.
Yfirleitt standa þessar manndómsvígslur yfir í nokkrar vikur á meðan sumarfrí eða vetrarfrí eru í almennum skólum í landinu. Sumarfrí stóð yfir nú í nóvember og desember síðastliðnum og stjórnvöld segja að alls hafi 41 nemandi í manndómsvígsluskólunum þá dáið vegna afleiðinga umskurðar. Ráðherra málefna er snúa að hefðbundum athöfnum í landinu segir vanrækslu óskráðra og skráðra skóla um að kenna en segir að foreldrar ungu mannanna beri einnig sína ábyrgð með því að hunsa öryggisreglur og ráðleggingar lækna.
Ráðherrann segir að ungu mönnunum sé ráðlagt að drekka ekki vatn til að sár þeirra grói hraðar, eftir umskurðinn, en það sé fjarstæðukennt og læknar mæli eindregið á móti því. Þegar foreldrar fari með syni sína í skóla þar sem svona vitleysa viðgangist og fylgist ekki með því að ungu mennirnir drekki eftir umskurðinn beri foreldrarnir sína ábyrgð ef illa fari.
Lágmarksaldur til að fá inngöngu í manndómsvígsluskóla er 16 ár en töluvert er um að foreldrar drengja sem eru yngri en það ljúgi til um aldur þeirra til að þeir fái inngöngu. Slíkir foreldrar eru á meðal fimmta tugs manna sem handteknir hafa verið vegna starfsemi ólöglegra manndómsvígsluskóla.
