Fimm karlmenn og tvær konur hafa verið ákærð í Svíþjóð fyrir fjölda glæpa sem beindust að tugum manna þar á meðal að opinberum starfsmönnum og kjörnum fulltrúum í Stokkhólmshéraði, fjölmennasta héraði landsins. Þeim glæpum sem beindust að kjörnu fulltrúunum og opinberum starfsmönnum var ætlað að hafa áhrif á opinberar ákvarðanir þeirra og lögreglan og embætti saksóknara segir því ljóst að hinir ákærðu hafi ógnað lýðræðinu.

Fram kemur í umfjöllun sænska ríkissjónvarpsins, SVT, að meðal þess sem fólkið er ákært fyrir er að hindra umgengni forsjárforeldra við barn, hegningarlagabrot, grófar hótanir í dómsmáli, hótanir í garð opinberra starfsmanna og kjörinna fulltrúa, íkveikju og skemmdarverk.

Einn af þessum sjö er ákærður fyrir alla ákæruliði en um er að ræða karlmann á fimmtugsaldri.

Sá maður, þrír af hinum karlmönnunum auk annarrar konunnar eru ákærð fyrir að ræna þremur börnum undir 15 ára aldri og halda þeim frá heimili þeirra.

Glæpir hinna ákærðu beindust aðallega að starfsmönnum í félagsþjónustu og kjörnum fulltrúum í því skyni að hafa áhrif á ákvarðanir þeirra.

Sara Norling saksóknari segir brot hinna ákærðu hafa verið skipulögð og mjög alvarleg.

Lögreglan segir þolendur vera um 40 talsins og að markmið hinna ákærðu hafi verið að hafa áhrif á grundvallargildi samfélagsins. Höfuðpaurinn í málinu er sagður dvelja í öðru landi, sem ekki er með framsalssamning við Svíþjóð, og réttað verður því yfir manninum að honum fjarstöddum.