Airbnb hefur beðið konu afsökunar eftir að gestgjafi hennar notaði gervigreind til að halda því fram að konan hefði valdið þúsundum dala tjóni.

Atvikið átti sér stað fyrr á þessu ári þegar konan sem búsett er í London í Bretlandi bókaði tveggja herbergja íbúð á Manhattan Í New York í tvo og hálfan mánuð, að því er The Guardian greindi frá.

Konan ákvað að yfirgefa Airbnb íbúðina fyrr en áætlað var vegna þess að henni fannst hún óörugg á svæðinu og dvaldi aðeins í sjö vikur. Stuttu eftir að hún fór hélt gestgjafinn því fram að hún hefði valdið 16.000 dala tjóni, tæplega 2 milljónir króna.

Gestgjafinn sendi inn myndir af sprungnu kaffiborði og hélt því fram að gesturinn hefði litað dýnu með þvagi og skemmt sjálfvirka ryksugu, sófa, örbylgjuofn, sjónvarp og loftkælingu.

Konan neitaði að hafa valdið neinum skemmdum á íbúðinni og sagðist aðeins hafa fengið tvo gesti á meðan á dvöl sinni stóð. Hún taldi að gestgjafinn, sem var skráður sem ofurgestgjafi (e. super-host) á Airbnb, væri líklega að hefna sín vegna þess að hún sagði leigusamningnum upp fyrr en áætlað var.

Í upphafi sagði Airbnb gestinum að eftir vandlega skoðun á myndunum þyrfti hún að greiða gestgjafanum rúmlega 7.000 dali, um 862 þúsund krónur, en hún áfrýjaði ákvörðuninni.

„Ég upplýsti þá um að ég get lagt fram vitnisburð frá sjónarvotti sem var með mér við útritun og getur vottað undir eiði um ástandið sem eignin var skilin eftir í: hrein, óskemmd og í góðu lagi,“ sagði konan við The Guardian.

„Ég sýndi einnig fram á greinileg sjónræn frávik í myndum af sama hlutnum (viðarborði) sem gestgjafinn lét í té sem sýna greinilega að myndin er ósönn,“ hélt hún áfram. „Þessi ósamræmi eru einfaldlega ekki möguleg í ósviknum, óklipptum ljósmyndum af sama hlutnum. Þetta hefði átt að vekja strax viðvörunarmerki og gera fullyrðingar gestgjafans ótrúverðugar ef sönnunargögnin hefðu verið skoðuð með nákvæmni, en Airbnb tókst ekki aðeins að bera klúðra því, heldur hunsuðu þeir skýringar mínar og sönnunargögn um að myndirnar væru uppspuni.“

Fimm dögum eftir að Airbnb voru spurð um atvikið var konunni sagt að áfrýjun hennar hefði verið samþykkt og 670 dalir hefðu verið færðir á reikning hennar. Þegar konan sagðist ekki ætla að bóka hjá Airbnb aftur bauð fyrirtækið henni endurgreiðslu upp 1140 dali. Konan hafnaði boðinu og fékk að lokum endurgreiddan allan kostnað bókunarinnar, um 5700 dali og neikvæð umsögn á prófíl hennar sem gestgjafinn skrifaði var fjarlægð.

Airbnb bað konuna einnig afsökunar og sagði að þeir myndu hefja innri endurskoðun á því hvernig málið var meðhöndlað. Þeir vöruðu einnig gestgjafann við að brjóta gegn skilmálum sínum og upplýstu hann um að hann yrði fjarlægður ef einhverjar svipaðar tilkynningar kæmu fram.

„Við tökum skaðabótakröfur alvarlega, sérfræðingateymi okkar fer yfir öll tiltæk sönnunargögn til að ná sanngjarnri niðurstöðu fyrir báða aðila og til að tryggja sanngjarna nálgun er hægt að áfrýja ákvörðunum,“ sagði Airbnb.

Konan sagðist óttast að framtíðarviðskiptavinir gætu orðið fórnarlömb svipaðra svika, þar sem hægt væri að nota gervigreind til að vinna með myndir. Það hefðu ekki allir úrræði til að verjast eins og hún gerði, og viðskiptavinir gætu einnig látið undan og greitt vegna ótta við að ástandið stigmagnist og krafan hækki.

„Miðað við hversu auðvelt það er nú að búa til slíkar myndir með gervigreind og Airbnb virðist samþykkja slíkt þrátt fyrir rannsóknir, ætti það ekki að vera svona auðvelt fyrir gestgjafa að komast upp með að falsa sönnunargögn á þennan hátt.“