Í átta ár, frá og með árinu 2002 eða þar um bil, voru eldri konur í Sverdlovsk-héraði í Rússlandi þolendur grimmiles ofbeldis og fundust síðar myrtar á heimilum sínum. Konurnar, 17 alls, fundust í blóðpollum með höfuðkúpur brotnar með öxi eða hamri.
Konurnar höfðu allar verið rændar, þó um litlar fjárhæðir væri að ræða, og í þremur tilfellum var kveikt í heimili þeirra til að fela vísbendingar um fjöldamorðin sem höfðu átt sér stað, að sögn yfirvalda. Í mörg ár leituðu yfirvöld að grunuðum manni, sem þau töldu vera karlmann, en án árangurs.
Árið 2010 dró hins vegar til tíðinda þegar í ljós kom að morðinginn sem lögreglan leitaði að var ekki karlmaður, heldur kona, Irina Gaidamachuk, sem varð þekkt sem alræmdasti kvenkyns raðmorðingi Rússlands.
„Hvernig gat einhver drepið brothætta og varnarlausa gamla konu á svona grimmilegan hátt?“ sagði Elena Golovenkina, en móðir hennar var myrt árið 2002 þegar Gaidamachuk sló hana ítrekað í höfuðið með styttu af Vladimir Lenin.
Gaidamachuk var handtekin árið 2010, þá 39 ára að aldri, eftir að einu fórnarlamba hennar tókst að flýja. Gaidamachuk var gift og tveggja barna móðir frá Krasnoufimsk í Sverdlovsk-héraði, næstum 1280 kílómetrum austur af Moskvu, og sagði lögreglunni að hún hefði barið konurnar til bana á meðan hún rændi þær.
„Hún er einstaklega grimm kona,“ sagði rannsóknarlögreglumaður sem vann að málinu. „Ég var sannfærður um að við værum að eiga við karlmann. Hvernig gat kona brotið höfuð með 24 höggum?“
„Um tíma, þegar vitni fóru að tala um konu, grunuðum við jafnvel mann klæddan sem kona,“ sagði rannsóknarlögreglumaðurinn.
„Hún sagði að hún hefði misst tölu á því hversu marga hún hafði drepið eftir tíunda morðið. Hún er mjög kaldlynd en líka heillandi og jafnvel aðlaðandi. Hún reyndi meira að segja að daðra við okkur á meðan við yfirheyrðum hans.“
Gaidamachuk vann yfirleitt traust fórnarlamba sinna með því að þykjast vera félagsráðgjafi.
„Ákærði leitar að eldri konum, finnur leið til að komast inn í íbúð þeirra, drekkur te í eldhúsinu þeirra eða biður um vatn,“ sagði saksóknarinn í málinu árið 2012. „Eftir það, þegar fórnarlambið snýr sér undan, slær hún það nokkrum sinnum í höfuðið með sljóum hlut. Hún hylur höfuð fórnarlamba sinna með einum eða fleiri kodda. Hún tekur aðeins peninga og skilur eftir gull og verðmæti. Allir glæpirnir eru af sama toga og með sömu atburðarás.“
Í einu tilviki, þegar Gaidamachuk gat ekki fundið neina peninga til að ræna, á hún að hafa gist hjá látnu fórnarlambi sínu og hulið sært andlit öldruðu konunnar með kodda.
Gaidamchuk var sögð hafa notað peningana sem hún stal til að kaupa áfengi.
Hún var sakfelld fyrir 17 morð og eina tilraun til morðs og dæmd í júní 2012 í 20 ára fangelsi.
Flestir glæpirnir voru framdir í Krasnoufimsk, þó að hún hafi framið svipaða glæpi í Jekaterinburg, Serov, Achit og Druzhinino.
