Árið 1987 hvarf Kay Josephine Medin, 48 ára, frá sveitaheimili sínu í Norður-Kaliforníu. Yfirvöld í Kaliforníu fengu tilkynningu um týndan mann þann 3. ágúst 1987.
Nickolas Medin greindi frá því að hann hefði farið í viðskiptaferð og þegar hann sneri aftur á heimili sitt í Hyampom kom í ljós að eiginkona hans, Kay Josephine, sem starfaði sem grunnskólakennari, væri týnd.
Fógetaskrifstofan í Trinity-sýslu leitaði á eigninni og skógunum í kring en engin merki fundust um Medin.
Rætt var við vini og fjölskyldu en engar mikilvægar vísbendingar komu fram.
„Hún kom aldrei í skólann,“ segir Mike Fridley, rannsóknarmaður kaldra mála (e. Cold Case) í Humboldt-sýslu, sem er að rannsaka málið. „Þeir kíktu, þeir höfðu samband við skólann hennar og þeir sögðu að hún virtist vera í góðu skapi og ánægð og hún væri ekki með nein læknisfræðileg vandamál eða neitt. Svo það var það sem augljóslega fékk alla til að velta fyrir sér hvað í ósköpunum gerðist. Dótið hennar er enn í húsinu. Bíllinn hennar er þarna. Hún hvarf bara.“
Hvarf Medin frá dreifbýlinu í Norður-Kaliforníu var talið grunsamlegt.
Síðan, 25. nóvember 1987, barst sýslumannsembættinu í Humboldt-sýslu pakki í pósti. Í kassanum voru beinagrindarleifar og nafnlaust bréf með „korti sem benti á staðsetningu fleiri leifa,“ segir Fridley.
Kortið gaf leiðbeiningar um staðsetningu nálægt Ammon Ridge Road í Austur-Humboldt-sýslu. „Þetta var mjög einfalt og almennt,“ segir hann um bréfið.
Þar fundu rannsóknarlögreglumenn fleiri líkamsleifar og gátu borið kennsl á Medin með því að nota tannlæknaskýrslur. Leifarnar voru ekki grafnar í jörðu.
Dánarvottorð var gefið út fyrir Medin ári síðar, árið 1988.
Enn er ráðgáta hver skrifaði bréfið. „Þetta gæti farið á hvorn veginn sem er,“ segir Fridley. „Þetta gæti bara hafa verið einhver sem var á rjúpnaveiðum og fann líkamsleifarnar, en vildi ekki bendla sig við málið, eða gæti verið morðinginn. Hver veit.“
Málið tók annan snúning þann 16. febrúar 1993, þegar Fortuna lögregludeildin hafði samband við fulltrúa Humboldt-sýslu með annan hræðilegan fund. Að þessu sinni fannst hluti af höfuðkúpu á ströndinni nálægt Trinidad Head, um 250 kílómetra frá þeim stað sem fyrri leifar Kay fundust.
DNA-sýni var tekið og skráð í gagnagrunn Kaliforníu yfir týnda einstaklinga, Missing Person DNA og National Unidentified Person DNA index, en engin samsvörun fannst.
Fógetaskrifstofan í Humboldt-sýslu fékk fjármögnun til að hreinsa upp óleyst mál þar sem ekki hafði tekist að bera kennsl á líkamsleifar og sendi höfuðkúpuna sem fannst árið 1993 til einkaréttarrannsóknarstofu Othram Inc. til erfðafræðilegrar ættfræðirannsóknar. Í september árið 2024 ákvað Othram að höfuðkúpan hefði líklega tilheyrt Medin.
Rannsakendur ræddu við dóttur hennar og fengu DNA sýni úr henni. Í byrjun maí 2025 staðfesti dómsmálaráðuneyti Kaliforníu að höfuðkúpan tilheyrði Medin.
Fridley segist vonast til að einhver komi fram með upplýsingar til að hjálpa honum að leysa málið.
„Ég er bara að leita að einhverjum sem gæti haft upplýsingar sem gætu hjálpað til við málið. Að kannski hefur einhver upplýsingar sem gætu komið þessu máli í gang aftur. Og þú veist, oft þegar tíminn líður gæti fólk komið fram og talað við okkur sem voru treg til að gera það þá.“
Nickolas Medin lést í ágúst 2018.
