Sjá einnig: Læknir um krabbamein Bidens – „Ég er dálítið hissa“
Ýmsum kenningum hefur verið varpað fram um málið, til dæmis að starfslið forsetans fyrrverandi hafi haldið því leyndu að Biden glímdi við krabbamein svo það hefði ekki áhrif á möguleika hans til endurkjörs í kosningunum í nóvember í fyrra.
Eins og frægt er orðið kom þó ekki til þess að Biden færi aftur fram því hann dró framboð sitt til baka í fyrrasumar og tók Kamala Harris við keflinu fyrir hönd Demókrata. Hún hafði ekki erindi sem erfiði og tapaði fyrir Donald Trump.
Í yfirlýsingu frá starfsliði Bidens í gær kom fram að Biden hefði ekki verið skoðaður sérstaklega vegna krabbameins í blöðruhálskirtli á síðustu árum. Raunar hafi það síðast gerst árið 2014.
Skimun fyrir krabbameini í blöðruhálskirtli felur venjulega í sér svokallað PSA-próf, sem mælir ákveðið prótein sem getur tengst krabbameini.
Í frétt NBC News er þói bent á að prófið sé þekkt fyrir að gefa oft rangar jákvæðar niðurstöður og hefur bandaríska forvarnarnefndin (e. US Preventive Services Task Force) ekki mælt með reglubundinni PSA-skimun hjá körlum eldri en 70 ára þar sem þeir eru líklegri til að deyja af öðrum orsökum. Þó hefur skimunaraðferðum nýlega verið breytt og eru fleiri einstaklingar nú skimaðir.
Los Angeles Times og NBC ræddu við lækna sem segja miðað við hversu langt krabbameinið er gengið hafi Biden gengið með það í mörg ár þar sem það fékk að vaxa óáreitt.
