Eins og kunnugt er afplána bræðurnir lífstíðardóm fyrir morð á foreldrum sínum, José og Mary Louise Menendez, árið 1989. Um málið voru gerðir leiknir sjónvarpsþættir sem vöktu mikla athygli, Netflix-serían Monsters: The Lyle and Erik Menendez Story sem frumsýnd var á síðasta ári.
Bræðurnir hafa að undanförnu barist fyrir því að fá frelsi og var Terry, sem er föðursystir þeirra, mætt í réttarsalinn á föstudag til að sýna þeim stuðning.
Í réttarsalnum drógu saksóknarar upp grafíska ljósmynd sem tekin var á vettvangi skömmu eftir morðin. Var myndin af bróður Terry og föður þeirra bræðra, en hann var skotinn í höfuðið með haglabyssu.
Aðstandendur fjölskyldunnar eru afar óhressir með saksóknara málsins, samkvæmt frétt Fox News, og benda á að engin viðvörun hafi verið gefin áður en myndinni var varpað fram. Vilja lögmenn fjölskyldunnra meina að saksóknarar hafi brotið gegn lögum sem snúa að réttindum fórnarlamba glæpa, lögum sem kallast Marsy’s Law.
Óvíst er hvort bræðrunum verði veitt frelsi eða dómi þeirra breytt, en samkvæmt fréttum bandarískra fjölmiðla komust þeir skrefi nær því í réttarhöldunum á föstudag.
Í frétt sem Fox News birti um málið í gær kom fram að Terry væri á gjörgæsludeild, en hún glímir við ristilkrabbamein.
