Barþjónar segja að einn tiltekinn kokteill hringi ákveðnum viðvörunarbjöllum þegar fólk pantar sér hann. Hér er um að ræða drykk sem gengur undir nafninu Long Island Iced Tea.

Þessi drykkur samanstendur af fimm sterkum áfengistegundum; vodka, tekíla, ljósu rommi, triple sec og gini. Í lokin er svo sletta af kóla-drykk, Coca Cola eða Pepsi yfirleitt, sett út í ásamt sítrónusafa.

Í samtali við Thrillist segir Morgan Robison, yfirbjarþjónn á veitingastaðnum Wenwen, að þeir sem panta sér drykkinn séu oftar en ekki í leit að því að verða drukknir á mjög skömmum tíma.

„Að stærstum hluta er þessi drykkur fyrir þá sem hugsa með sér: „Þetta er skilvirkasta leiðin til að komast þangað sem ég ætla mér,“ segir Morgan.

Undir þetta tekur Marisol Delarosa, yfirbarþjónn á Brass Monkey í New York. Hún segir að fæstir panti sér drykkinn vegna þess hversu vel hann bragðast. „Viðkomandi vill verða drukkinn á skömmum tíma og mun eflaust verða mjög hávær,“ segir hún.

Skemmtanastjórinn Daniel Meursing segist deila þessum áhyggjum og segist hann í hálfkæringi líta til næsta dyravarðar þegar einhver pantar sér drykkinn.