Eftir að hafa kyrkt og barið eiginkonu sína til bana, fór Mark Donovan á pöbbinn og síðan lá leiðin á tvær nuddstofur. Því næst fór hann og keypti sér kínverskan mat og var í óðaönn að borða hann þegar hann gekk inn á lögreglustöð í Ilford í Essex á Englandi og játaði að hafa banað eiginkonu sinni.

Mirror segir að Donovan, sem er 39 ára, hafi ekki játað að hafa myrt eiginkonu sína, hina 37 ára Elsie Mason. Hann bar við sjálfsvörn og sagði að hún hafi hótað honum með hníf og svívirt hann með orðum þennan örlagaríka dag í apríl 2023.

Þegar lögreglumenn fóru að heimili þeirra eftir að Donovan gekk inn á lögreglustöðina, fundu þeir alblóðugt lík Mason á gólfinu. Teppi hafði verið breytt yfir það. Hún var með rúmlega 70 áverka á andlitinu, höfðinu, hálsinum, efri hluta líkamans, handleggjum og fótleggjum. Blóðblettir fundust á veggjum og húsgögnum í íbúðinni.

Saksóknari sagði fyrir dómi að ástarbréf frá nýjum unnusta hennar, hafi fundist við hlið líksins. Sagði hann að líklega hafi Donovan orðið mjög afprýðissamur þegar hann fann bréfið og hafi ráðist á hana. Bréfið hafði verið brotið snyrtilega saman og þykir það benda til að Mason hafi geymt það í handtöskunni sinni.

Verjandi Donovan hélt því fram skjólstæðingur hans glími við andleg veikindi og hafi hugarástand hans litast af því þegar hann banaði Mason. Af þeim sökum ætti aðeins að sakfella hann fyrir manndráp af gáleysi en ekki morð.

Kviðdómurinn tók ekki undir þetta þegar hann kvað upp úrskurð sinn í síðustu viku og var einróma niðurstaða hans að Donovan hefði myrt Mason.

Dómari kveður upp úr um refsingu hans á næstu dögum.