Franskt par hefur verið dæmt í fangelsi fyrir að hafa sagað hausinn af hundinum þeirra til að „hefna kattarins“. Parið var drukkið þegar þetta gerðist en þetta átti sér stað í Auxerre í Frakklandi.

Samkvæmt fréttum fjölmiðla þá fann lögreglan hundinn dauðan á heimili parsins þegar hún var kölluð þangað vegna heimilisófriðar í maí á síðasta ári.

Málið var tekið fyrir dóm í síðustu viku og sagði konan að hún hefði stungið hundinn, sem var af tegundinni Argentinia mastiff, eftir að hún fann kött unnusta síns dauðan. Sagði hún að hundurinn hefði drepið köttinn. Le Parisien skýrir frá þessu.

Parið sagði fyrir dómi að það hefði vilja svæfa þennan „hættulega“ hund og sagði maðurinn að „afhausun“ hafi verið eina aðferðin sem honum datt í hug til að gera þetta.

Hann sagði að þau hefðu drukkið ótæpilega, lítra af vodka og tvo bjóra hvort, áður en hryllilegar 20 mínútur tóku við þar sem þau réðust á hundinn.

Nokkrir aðrir kettir og hundar voru á heimilinu því parið hafði í hyggju að hefja hundaræktun.

Maðurinn, sem er 38 ára, var dæmdur í 18 mánaða fangelsi og konan, sem er 31 árs, var dæmd í tveggja ára fangelsi.