Dómstóll í Svíþjóð sektaði nýlega 55 ára mann fyrir að hafa verið undir áhrifum áfengis þegar hann flaug dróna. Sagði dómurinn að sömu reglur gildi varðandi þetta og að aka undir áhrifum áfengis.

The Guardian segir að talið sé að þetta sé í fyrsta sinn sem einhver hefur verið saksóttur fyrir brot af þessu tagi í Svíþjóð.

Fá ríki hafa gert það refsivert að vera undir áhrifum áfengis þegar dróna er flogið. Japanir gerðu þetta refsivert 2019.

Málið kom upp þegar lögreglan var að nota dróna í Rättvik, sem er í miðju landinu, til að fylgjast með fornbílasamkomu. Komu lögreglumenn þá auga á annan dróna á flugi á svæði þar sem allt drónaflug var bannað.

Lögreglumenn fundu stjórnanda drónans og þar sem grunur lék á að hann væri undir áhrifum áfengis var blóðsýni tekið úr honum. Reyndist áfengismagnið vera 0,69 prómill. Samkvæmt sænskum umferðarlögum er refsivert að stýra ökutæki ef áfengismagnið í blóði er meira en 0,02 prómill.

Maðurinn neitaði sök og sagði að vinur hans hafi stýrt drónanum en sá var ekki á staðnum þegar lögreglan handtók hann.

Dómurinn lagði ekki trúnað að þennan framburð hans og sektaði hann um 32.000 sænskar krónur.