Fjölskylda í Flórída segist heppin að vera á lífi eftir að kviknaði í heimili þeirra. Mina Raky, kennari og fjögurra barna faðir, segir í samtali við People  að hann hafi sofið út þar sem hann var að klára lokaritgerð sína fyrir doktorsgráðu þriðjudaginn 2. desember. Hann notar venjulega heyrnartól með hávaðadeyfingu þegar hann sefur, en hann gerði það ekki þennan tiltekna morgun, sem gerði honum kleift að heyra popphljóð fyrir utan tveggja hæða hús sitt í Sanford um klukkan fimm að staðartíma. 

„Þetta var fyrsta kraftaverkið,“ segir hann.

Raky hélt að hljóðin kæmu frá hugsanlegum innbrotsþjófi og fór því út í bílskúr til að sækja skotvopnið ​​sitt. Í staðinn sá hann Tesla-bifreið sína sem var í hleðslu og mikinn reyk. Raky segir að fyrsta hugsun hans hafi verið að koma bílnum út úr húsinu, en bíll eiginkonu hans var lagður rétt fyrir utan í innkeyrslunni, svo að stígurinn var lokaður. Þar sem hann gat ekki fengið komið Teslunni út fór Raky strax að öskra til að vekja konu sína og fjögur börn þeirra: Lily, 18 ára, Emmanual, 12 ára, Liana, 11 ára og Miarose, átta ára.

Kona hans og þrjú yngri börn þeirra komu út úr húsinu, en ekki Lily, sem var á annarri hæð. Hún heyrði í reykskynjurunum og fór að leita að bróður sínum, Emmanuel, sem á næsta herbergi við hennar, án þess að vita að hann væri þegar kominn út.

„Ég reyndi að finna einhverja leið til að komast inn í húsið til að fara upp á aðra hæð. En ég gat það ekki, eldurinn var að éta upp stigann,“ segir Raky.

Vitandi að dóttir hans gæti ekki heldur notað stigann fór Raky út í bakgarðinn og hrópaði nafn Lily eins nálægt glugganum sínum og hann gat. Sem betur fer gat hún komist þangað, opnað gluggann og hoppað út.

Eftir að hafa lent heilu og höldnu fékk Lily súrefni hjá fyrstu viðbragðsaðilum áður en hún var flutt með sjúkrabíl og útskrifuð síðar sama dag. Hundur fjölskyldunnar fékk einnig meðferð.

Samkvæmt skýrslu slökkviliðsins í Sanford voru  upptök eldsins við eða í kringum hleðslustöð Teslunnar í bílskúrnum. Í skýrslunni kom einnig fram að eldurinn, sem er enn til rannsóknar, „virtist ekki vera af ásettu ráði eða grunsamlegur að eðlisfari.“

Raky segir að hann hafi átt Tesluna sem varð fyrir miklu tjóni, í meira en ár  og að hann hafi aldrei lent í neinum vandræðum með hleðslustöðina áður.

„Tesla er góður bíll,“ segir hann, en bætir við, „byggið hleðslustöð fyrir utan heimilið. Ekki hlaða í bílskúrnum.“

Þótt heimili þeirra hafi verið eyðilagt og fjölskyldan búi nú í Airbnb íbúð, segir Raky að þau hafi notið mikillar blessunar.

„Við lifum í kærleika samfélagsins, kærleika kirkjufjölskyldunnar okkar. Við fáum hjálp frá sýslunni, frá skólakerfinu … Ég er umkringdur ást og umhyggju.“

Á meðan hefur Lily skipulagt GoFundMe söfnun þar sem leitað er eftir framlögum til að hjálpa fjölskyldunni að endurbyggja eftir brunann.

„Á örfáum mínútum misstu þau allt, föt, húsgögn, fjölskylduminningar og öryggistilfinninguna sem heimili veitir. Sem betur fer komust allir heilir á húf frá brunanum, en það verður erfitt að endurbyggja heimili og safna nauðsynjum.“

Raky segir að fjölskyldan sé að endurbyggja líf sitt, sérstaklega barnanna vegna. „Við erum að kaupa föt, reyna að hafa eitthvað undir jólatrénu fyrir börnin. Maður vill líða eðlilega. Svo við erum að reyna að fá þau til þess með nýjum skóm, nýjum fötum, nýjum bakpokum. Við misstum allt. Þetta er mikið áfall.“

Hann viðurkennir samt að útkoman hefði getað verið miklu verri. „Ég er kristinn. Ég er trúaður. Svo þegar maður horfir á allt atburðarásina sér maður að hönd Guðs umkringdi okkur. Hann vakti mig á réttum tíma.“