Goðsögn úr heimi UFC-bardagakeppninnar (Ultimiate Fighting Championship) hefur verið ákærður fyrir ítrekaðar árásir gegn fjölskyldumeðlimum. Dómari hefur nú skipað honum að gangast undir geðmat til að meta hvort hann sé sakhæfur, en líklegt þykir að goðsögnin glími við óvenjulegan geðsjúkdóm.

Um er að ræða afreksmanninn og heimsmeistarann B.J. Penn sem lagði hanskana á hilluna árið 2019. Kappinn kemur frá Hawaii og vakti það sérstaka athygli hér á landi árið 2008 þegar hann valdi okkar mann, Gunnar Nelson, í sérstakan undirbúningshóp fyrir titilbardaga sinn gegn hinum bandaríska Sean Sherk. Gunnar sagði þá í samtali við DV að B.J. væri ótrúlegur íþróttamaður.

Undanfarið hefur þó hallað undan fæti hjá heimsmeistaranum en að sögn erlendra miðla glímir hann við alvarlegar ranghugmyndir. Mun hann vera sannfærður um að fjölskylda hans hafi verið myrt og þeim skipt út fyrir loddara. Hann hefur nú fimm sinnum verið handtekinn síðan í maí út af deilum við móður sína.

Verði Penn metinn ósakhæfur verður hann lagður inn á viðeigandi stofnun svo hann geti fengið þá meðferð sem hann þarf. Penn mótmælti geðmatinu og segist vera heill á geði. Móðir hans hefur fengið nálgunarbann gegn honum en hún segir hann glíma við sjaldgæfan geðsjúkdóm sem kallast Capgras-heilkenni sem valdi því að hann trúir því að fjölskyldu hans hafi verið skipt út fyrir loddara.

Undanfarið ár hefur Penn birt færslur á samfélagsmiðlum þar sem hann gerir grein fyrir þessari kenningu sinni, en ranghugmyndirnar virðast einkum beinast gegn móður hans. Þegar móðir hans fór fram á nálgunarbann lýsti hún ógnvekjandi hegðun sonar síns. Þegar hún sneri heim úr ferðalagi í maí hafi hún tekið eftir því að mikið af eigum hennar, svo sem fatnaður, skór, skartgripir og jafnvel rúm hennar, höfðu verið fjarlægðar úr svefnherbergi hennar. Nokkrum dögum síðar hvarf veski hennar með öllum hennar kortum og skilríkjum. Penn var farinn að hegða sér undarlega og beitti ýmsum brögðum til að koma í veg fyrir að hún kæmist inn í herbergi sitt. Hann fór að stunda það að lýsa vasaljósi framan í hana og sakaði hana um að vera loddara. Svo hafi ofbeldið byrjað.