Umfangsmikil lögregluaðgerð á heimili hins 32 ára Joseph A. Rossomando leiddi til þess að 15 ára stúlka, sem hafði verið saknað í tæpt ár, fannst á lífi síðastliðinn mánudag.
Stúlkan var á heimili mannsins og hefur Joseph þessi verið ákærður fyrir fjölmörg brot, þar á meðal kynferðisbrot gegn barni, mansal og vörslu á barnaníðsefni.
Í frétt NBC News kemur fram að lögregla hafi ráðist til inngöngu á heimili mannsins eftir að hafa fengið ábendingu um að stúlkan væri hugsanlega hjá manninum.
Tilkynnt var um hvarf stúlkunnar í júní í fyrra en þá var hún búsett í Reading í Pennsylvaniu.
Maðurinn er sagður hafa verið búsettur í tiltölulega rólegu hverfi innan um venjulegt fjölskyldufólk. Eru nágrannar hans skiljanlega í töluverðu uppnámi vegna málsins.
„Þetta gerir það að verkum að maður vill vera meira vakandi fyrir svona hlutum og meðvitaðri um það sem er í gangi í kringum mann,“ segir nágranni mannsins.
