Mikill harmleikur tók enda fyrir dómstóli í Lincolnskíri á Englandi (Lincolnshire Crown Court) á föstudag. Hin 29 ára gamla Amy Sheppard fékk þá 20 mánaða skilorðsbundinn dóm fyrir að valda dauða tveggja svona sinna í umferðarslysi sem hægt hefði verið að afstýra.

Dómari ákvað að hlífa henni við fangelsisvist. Slysið átti sér stað A52 þjóðveginum nálægt Sutton-on-Sea í Lincolnskíri í október árið 2023. Annað afturdekkið undir Vauxhall Astar bíl Amy var loftlítið sem leiddi til þess að bíllinn rásaði til í beygju og fór inn á ranga akrein, gegn aðvífandi umferð, og lenti framan á bíl af gerðinni Audi sem kom úr gagnstæðri átt.

Ökumaður Audi-bílsins, eiginkona hans og bróðir slösuðust öll illa og gengust undir viðamiklar aðgerðir á sjúkrahúsi. Amy slasaðist einnig illa en synir hennar tveir, 8 og 6 ára, létust báðir. Rannsókn leiddi í ljós að þeir voru báðir rétt og tryggilega festir í viðeigandi barnabílstóla. Hins vegar var það á ábyrgð Amy að hafa bílinn svo illa útbúinn að það leiddi til þessa hörmulega slyss. Var hún því ákærð fyrir manndráp.

Amy Sheppard hafði fengið einhvern til að kanna dekkið daginn fyrir slysið en svo óheppilega vildi til að viðkomandi hafði misskilið hana og kannað þrýstinginn í dekkinu að framanverðu. Daginn eftir uppgötvaði hún að dekkið var enn í ólagi en hélt samt sínu striki með hörmulegum afleiðingum.

Dómarinn í málinu sagði að Amy Sheppard væri blíð og gefandi manneskja sem nú yrði að bera þá byrði það sem eftir væri ævinnar að hafa með kæruleysi valdið dauða tveggja barna sinna.

Sjá nánar á vef Metro.