Í gærkvöldi höfðu áströlsk yfirvöld staðfest að minnst sextán væru látnir eftir að tveir byssumenn hófu skothríð á hinni vinsælu ferðamannströnd í gær.
Talið er að árásin hafi verið beintengd ljósafögnuði gyðinga sem fram fór á svæðinu og engin tilviljun hafi ráið því að ódæðismennirnir létu til skarar skríða á þessum tiltekna stað.
Myndband af því þegar Ahmed afvopnar annan byssumanninn hefur vakið mikla athygli, en Ahmed særðist sjálfur eftir að hafa orðið fyrir tveimur byssukúlum. Læddist hann aftan að öðrum byssumanninum og tókst honum að ná af honum byssunni.
7News Australia ræddi við frænda hans, Mustafa, en í gærkvöldi sagði hann að Ahmed væri enn á sjúkrahúsi, en heimildir herma að hann hafi gengist undir aðgerðir vegna tveggja skotsára á handlegg. Hann er ekki talinn í lífshættu þegar þetta er skrifað.
„Við vonum að hann verði í lagi. Hann er hetja, 100% hetja,“ segir Mustafa.
Undir þetta tók Anthony Albanese, forsætisráðherra Ástralíu. „Í dag höfum við séð Ástrala leggja líf sitt í hættu til að hjálpa öðrum. Þetta eru hetjur og engin spurning um að þetta hafi bjargað mannslífum.“
Byssumennirnir voru tveir sem fyrr segir og var annar þeirra skotinn til bana, en fregnir af ástandi hins voru þær í gærkvöldi að hann væri „alvarlega slasaður“.
Annar árásarmannanna heitir Naveed Akram og er 24 ára, búsettur í Bonnyrigg í suðvesturhluta Sydney. Lögregla réðst til inngöngu á heimili hans í gær eftir ódæðið. Hann er talinn hafa særst í skotbardaga við lögreglu. Hinn árásarmaðurinn hefur ekki verið nafngreindur en hann var skotinn til bana á vettvangi.
Meðfylgjandi er myndband frá Daily Mail af því þegar Ahmed afvopnar manninn.
