Ef þú hélst að pólitík og vísindaskáldskapur væru tveir aðskildir heimar, þá skaltu halda fast í álhattinn þinn. Michael Kratsios, vísindaráðgjafi Donald Trump, sagði nýlega svolítið sem varð til þess að venjulegt fólk, samsæriskenningasmiðir og notendur samfélagsmiðla horfðu undrandi á hver annan.

„Við ráðum yfir tækni sem getur beygt tíma og rúm,“ sagði hann á samkomu Endless Frontiers nýlegar. Þetta er samkoma fyrir fólk sem saknar þess tíma þegar Bandaríkin flugu hátt og hugsuðu stórt.

Kratsios þuldi upp hvernig tækniframfarir einkenndu sjöunda og áttunda áratuginn, tunglferðir, hljóðfráar flugvélar og draumurinn um næstum því ókeypis rafmagn. En síðan stoppaði allt og sagði hann að ástæðan væri allt of mikið regluverk, skrifræði og hugsjónaskortur.

Því næst lét hann sprengjuna falla: „Við ráðum yfir tækni sem getur beygt tíma og rúm. Hún eyðir fjarlægðum, lætur hluti stækka, eykur framleiðnina.“

Það þarf ekki að koma á óvart að víða í netheimum logaði allt í kjölfar ummælanna. Sérstaklega hjá þeim sem telja að Philadelphia-tilraunin á fimmta áratugnum (hún snerist að sögn um að láta herskip verða ósýnileg og flytja þau á milli staða með nánast hugarafli) hafi átt sér stað og að fljúgandi furðuhlutir séu til og séu geymdir á Area 51.

Á Reddit sagði fólk að Kratsios „hafi óvart“ skýrt frá einhverju sem hann hafi ekki átt að segja frá.