Mikið var fjallað um mál drengsins, Émile Soleil, á sínum tíma en hann hvarf þegar hann var í heimsókn hjá afa sínum og ömmu í umræddu þorpi. Í mars 2024 fundust líkamsleifar hans, þar á meðal höfuðkúpa, skammt frá staðnum þar sem hann sást síðast á.
Sjá einnig: Varpa fram kenningu um hvarf Émile sem gæti kollvarpað rannsókninni
Ýmsum kenningum var varpað fram um hvað kom fyrir en bitför voru meðal annars á höfuðkúpunni og veltu ýmsir því fyrir sér hvort úlfar hefðu numið drenginn á brott. Þá var ekki útilokað að hvarf hans hefði verið af mannavöldum. Enn önnur kenning var á þá leið að Émile hefði orðið fyrir vinnuvél á svæðinu þar sem uppskerutími var þegar hann hvarf.
Það var amma Émile sem hringdi í lögregluna þann 8. júlí 2023 og tilkynnti hvarf hans. Hún sagði að Émile hafi sofið fram undir klukkan 17. Þegar hún hringdi í lögregluna klukkan 18.12 hafði hún leitað hans í 45 mínútur.
Um 800 manns tóku þátt í leitinni og bestu sporhundar Frakklands voru fluttir til þorpsins til að aðstoða við leitina. Þeir eru sagðir hafa rekið slóð Émile að ákveðnum stað um 50 metra frá heimili afa hans og ömmu. Þar virðist slóðin hafa horfið og engu líkara en Émile hafi verið lyft upp og ekki settur niður aftur.
Nú greina franskir fjölmiðlar frá því að afinn og amman liggi undir grun í málinu um að hafa orðið Émile að bana og falið lík hans. Philippe og Anne Vedovini, sem bæði eru 59 ára, voru handtekin í morgun og færð í varðhald ásamt tveimur uppkomnum börnum sínum. Þá var húsleit gerð á föstum dvalarstað þeirra sem er í nágrenni frönsku borgarinnar Marseille.
Í yfirlýsingu sem saksóknaraembættið sendi frá sér voru handtökurnar staðfestar og sagt að þær væru afrakstur þrotlausrar vinnu lögreglu síðustu mánuði. Lögmaður Vedovini-hjónanna vildi ekki tjá sig um málið þegar eftir því var leitað í morgun.
