The Guardian skýrir frá þessu og segir að síta múslimar, sem eru hið ráðandi afl í íröskum stjórnmálum, hafi í rúmlega áratug barist fyrir því að draga úr réttindum kvenna.
Ólíkt því sem er í nágrannaríkinu Sádí-Arabíu, þá er ekki kerfi við lýði sem kveður á um að konur séu undir ofurvald karla seldar og þurfi leyfi frá karlmanni til að gera næstum hvað sem er. Þær þurfa að fá leyfi frá eiginmanni sínum, föður eða öðrum karlmanni, sem hefur yfir þeim að segja, til að geta tekið stórar ákvarðanir á borð við að ganga í hjónband.
Þessu vilja sítar í Írak breyta og samkvæmt frumvarpinu, sem var samþykkt í fyrstu umræðu á þinginu í síðustu viku, munu trúarleg yfirvöld fá heimild til að taka ákvarðanir varðandi fjölskyldumálefni á borð við hjónaband, skilnað og forræði yfir börnum.
„Þetta er hryllingur fyrir konur,“ hefur The Guardian eftir Raya Faiq, sem sér um samhæfingu aðgerða hópa og samtaka sem eru á móti lagafrumvarpinu. Í þessum hópum eru meðal annars þingmenn.
„Eiginmaður minn og ég, við erum á móti barnahjónaböndum. En ímyndið ykkur ef dóttir mín giftist og eiginmaður hennar vilji gefa dótturdóttur mína í hjónaband á barnsaldri. Samkvæmt nýju lögunum gæti hann gert og ég hefði ekkert um það að segja. Þessi lög lögleiða barnanauðganir,“ sagði hún.
Frá því á sjötta áratugnum hefur fólk þurft að hafa náð 18 ára aldri í Írak til að mega ganga í hjónaband. En samkvæmt könnun sem Unicef, barnahjálp SÞ, gerði, þá ganga 28% íraskra stúlkna í hjónaband áður en þær ná 18 ára aldri.
