Eins og DV greindi frá fyrir stuttu hafa tveir 12 ára drengir verið sakfelldir fyrir morð í Bretlandi. Myrtu drengirnir hinn 19 ára gamla Shawn Seesahai í Wolverhampton á Englandi á síðasta ári. Morðið var afar hrottalegt en annar drengurinn hjó í hinn látna með sveðju á meðan hinn sparkaði í hann auk þess að stappa á honum.
Nú hafa frekari upplýsingar komið upp á yfirborðið um annan drengjanna en nágrannar segja hann snarruglaðan og að þeir hafi neyðst til að verja heimili sín fyrir honum með gaddavír.
Það er Mirror sem greinir frá. Þar kemur fram að nágrannar drengsins lýsi honum sem snarrugluðum (e. twisted in the head). Þeir segja drenginn hafa reglulega framið skemmdarverk í hverfinu sem hann bjó í meðal annars á ljósastaurum. Hann hafi einnig stolið ýmsu og stundað það að setja flugelda í bréfalúgur. Það kemur ekki fram hvort hann hafi kveikt um leið í þeim.
Nágrannarnir segja drenginn hafa yfirleitt gengið með hníf á sér og hann hafi verið meðlimur í glæpagengi.
Einn nágranni sem kallar drenginn skítseiði segist hafa óttast mjög að drengurinn myndi brjótast inn til hans og hann hafi því varið heimilið með gaddavír.
Annar nágranni bendir á að vegna ungs aldurs drengsins muni hann líklega verða leystur úr haldi fyrir tvítugt. Þegar hann hafi náð slíkum aldri muni hann verða enn óviðráðanlegri. Hann segir blasa við að drengurinn sé einfaldlega snarruglaður.
Þrýst hefur verið á dómara málsins að aflétta leyndinni sem ríkt hefur um nöfn drengjanna til að senda öðrum ungmennum sem ganga með eggvopn skýr skilaboð. Morð og aðrir glæpir þar sem eggvopnum er beitt hafa verið sívaxandi vandamál undanfarin ár í Bretlandi.
