Dæmi eru um að ferðamenn stundi kynlíf úti á götum, fíkniefni ganga kaupum og sölum eins og sælgæti og túristar gera þarfir sínar þar sem þeir standa.
Hefur þetta orðið til þess að yfirvöld hafa ákveðið að skera upp herör gegn ferðamönnum sem haga sér illa á almannafæri. Í Palma, Llucmajor og Magaluf á Majorka og San Antonio á Ibiza, geta ferðamenn átt von á að fá 500 til 1.500 evra sekt ef þeir gerast sekir um ósæmilega hegðun.
Þá hefur verslunum verið bannað að selja áfengi frá klukkan 21:30 á kvöldin til klukkan 8 á morgnana.
„Ástandið hér er ekki gott. Það snýst allt um að drekka og djamma, hér eru engar fjölskyldur. Við þurfum fleiri fjölskyldur. Flestir ferðamennirnir ganga mjög illa um eyjuna okkar. Maður hefur séð hnignunina á síðustu árum,“ segir Sergio Taltavull, sem er eigandi Casa Diego-veitingastaðarins á Magaluf, í samtali við Daily Mail.
Sergio segir að breytingarnar nú séu því til komnar af illri nauðsyn en sjálfur hefur hann verið búsettur á Majorka alla sína ævi. „Yfirvöld eru að reyna og við verðum að sjá hvort þetta virki. Þessi eyja er algjör paradís en við þurfum að breyta þessari ferðamannamenningu.“
Ariana Risquo-Tomops, eigandi Restaurant Pizzeria, tekur undir þetta með Sergio.
„Ferðamenn yfirgefa staðinn án þess að borga, taka fíkniefni inni á klósettunum og eru ágengir – en þetta á auðvitað ekki við um alla,“ segir hún.
