Í lok desember 2022 handtók lögreglan í Viktoríuríki í Ástralíu eldri konu í kjölfar þess að lögreglumenn komu á heimili hennar til að kanna með ástandið á bróður hennar. Í ljós kom að hann hafði látist nokkrum árum áður og að konan hafði sofið við hlið rotnandi líks hans, hugsanlega í allt að fimm ár.

Nágrannar systkinanna höfðu nefnt húsið „Hryllingshúsið“ vegna umgengninnar en rusl þakti gólfin og allt upp í rjáfur, þar voru rottur, mannasaur og „blóðug beinagrind“.

Lögreglumenn þurftu að nota kúbein til að spenna glugga upp til að fara inn um. Þegar starfsmenn tæknideildar lögreglunnar komu síðar á vettvang þurftu þeir að vera í eiturefnabúningum inni í húsinu á meðan þeir fjarlægðu beinagrind bróðurins.

Konunni, sem er á áttræðisaldri, var fljótlega sleppt úr haldi. Lögreglan er enn að rannsaka hvað varð bróður hennar að bana.

Nágrannar segja að líklega hafi líkið ekki fundist árum saman vegna þess hversu mikið rusl og viðbjóður var í húsinu.

Bróðirinn sást síðast á lífi 2018.