Fylgst var með ferðum bjarndýranna á árunum 2019 til 2022 og var markmiðið að sjá hvernig dýrunum reiðir af í sífellt erfiðari aðstæðum vegna hlýnunar jarðar. Talið er að um 26.000 ísbirnir séu til í heiminum í dag.
Niðurstöður vísindamannanna birtust í tímaritinu Nature Communications og er óumdeilt að talsverðar breytingar hafa orðið á lífi ísbjarna á síðustu áratugum.
Áður fyrr gátu ísbirnir gengið yfir frosna íshelluna yfir vetrartímann í leit að fæði, einkum selum.
Yfir sumarmánuðina minnkar íshellan og þá hefur getur lífsbaráttan orðið erfiðari hjá dýrunum sem þurfa þá að leggja á sig talsvert ferðalag á sundi. Hlýnun jarðar hefur gert það að verkum að þessi tímabil eru sífellt að lengjast og eru ísbirnir í auknum mæli farnir að leita eftir æti á landi af þessum sökum.
Eru dæmi um birnur með húna sem geta illa framleitt mjólk fyrir afkvæmi sín vegna fæðuskorts. Þá leggi dýrin á sig fleiri kílómetra ferðalög eftir að hafa ekki borðað dögum saman.
Bandaríski líffræðingurinn Anthony Pagano fór fyrir rannsókninni og segir hann að ísbirnir séu klókar skepnur sem geti aðlagast breyttum veruleika og þá hafi þeir gert að einhverju leyti. Það séu þó ekki endilega góð tíðindi að ísbirnir leiti upp á land – og jafnvel í byggð – eftir fæði enda ójafn leikur komist mannskepnan í návígi við hungraðan ísbjörn.
