Bitcoin hefur hækkað stjarnfræðilega í verði á síðustu 10-15 árum og til marks um það kostar ein Bitcoin-rafmynt um 13,5 milljónir króna í dag. Og þegar DV fjallaði um mál Howells árið 2013 var áætlað að heildarupphæðin í tölvunni væru 780 milljónir króna. Í dag eru þetta hins vegar hundrað þúsund milljónir króna.
Howell ætlar nú að gera lokaatlögu í að reyna að finna tölvuna en talið er að hún sé grafin í jörðu á landfyllingarsvæði í Newport í Wales. Fái hann grænt ljós á gröftinn hefur hann lofað að gera Newport að Dubai eða Las Vegas Bretlandseyja.
Hingað til hafa yfirvöld hafnað beiðni hans um að leita harða disknum en hann segist vera reiðubúinn að fara fyrir dómstóla til að fá þeirri ákvörðun hnekkt. Hefur hann raunar þegar höfðað mál sem verður tekið fyrir í desembermánuði. Búist er við því að lögfræðingar yfirvalda í Newport fari fram á að málinu verði vísað frá.
Í umfjöllun breskra fjölmiðla í vikunni sagði James að fyrrverandi kærasta hans hafi hent poka sem innihélt diskinn árið 2013. Sjálfur safnaði hann Bitcoin árið 2009 þegar myntin var ný af nálinni og verðmæti hennar í lágmarki. Á þeim tíma var þetta tiltölulega auðvelt enda fáir sem notuðu gjaldmiðilinn og ekki þurfti ýkja mikið reikniafl til að leyfa Bitcoin-millifærslum að ganga í gegnum tölvuna. Á harða disknum var að finna svokallað veski – lykil að myntinni en án þessa lykils eru myntin horfin að eilífu.
Howells segist vongóður um að fá leyfi til að grafa upp landfyllingarsvæðið en hann hefur lofað því að Newport fái tíu prósent af því sem er á disknum. Það er upphæð sem nemur 10 milljörðum króna. „Borgaryfirvöld lifa á hinum myrku miðöldum. Það væri hægt að breyta þessu svæði í Las Vegas eða Dubai ef ráðamenn hefðu einhverja framsýn. En þeir vilja ekki skilja hvernig rafmyntir virka og vilja ekki læra.“
James segist hafa ráðfært sig við sérfræðinga á sviði umhverfismála og það væri hægt að grafa svæðið upp án þess að það hefði mikla röskun í för með sér á umhverfið.
