Maður hefur verið dæmdur í 22 mánaða fangelsi í Bretlandi fyrir innbrot sem verður að teljast í undarlegri kantinum. Maðurinn braust inn á heimili konu en stal engu heldur vann ýmis heimilisverk og skildi eftir skilaboð sem fylltu konuna þó nokkrum óhug.

Fjallað var um málið í mörgum af helstu fjölmiðlum Bretlands.

Í umfjöllun Daily Mail kemur fram að innbrotið átti sér stað í júlí á þessu ári en konan býr í Monmouthshire í Wales. Damian Wojnilowicz sem er 36 ára gamall braust inn á heimili konunnar. Hann hengdi upp þvott, gekk frá vörum sem konan hafði keypt, tæmdi endurvinnslutunnuna, fyllti á fóðurkassa í garðinum sem ætlaður er fuglum, færði til pottaplöntur og skildi eftir miða þar sem á stóð:

„Hafðu ekki áhyggjur, vertu glöð, fáðu þér að borða og klóraðu þér.“

Konan segist hafa komið heim eftir vinnu og séð að greinilega hefði einhver fært til hluti á heimilinu og hún væri einfaldlega of hrædd til að vera þar.

Fyrir utan allt þetta hafði Wojnilowicz tekið mat úr skápum og eldað hann á eldavélinni og þegar hann raðaði matvælum, sem konan hafði keypt, í ísskápinn endurraðaði hann öllu sem var fyrir í ísskápnum. Þar að auki skipti hann um hausa á tannburstum á heimilinu, skúraði gólfið og tók fram rauðvínsflösku sem konan átti og skildi hana eftir ásamt vínglasi og tappatogara sem og skál með sælgæti í.

Brotist inn víðar

Um tveimur vikum síðar var Wojnilowicz handtekinn í kjölfar þess að hann braust inn í sumarbústað í nágrenninu og hafði meðal annars farið í sturtu, þvegið föt sín og gætt sér á mat sem var þar. Fingraför hans reyndust vera þau sömu og fingraför sem fundust á heimili konunnar.

Konan sagði að á þessum tveimur vikum hefði hún verið logandi hrædd og talið sig mögulega vera þolanda eltihrellis. Hún sagðist of hrædd til að búa ein á heimilinu eins og áður og ætlar sér að flytja.

Damian Wojnilowicz er sagður heimilislaus og glíma við margþætta erfiðleika. Hann var á sakaskrá áður en hann framdi innbrotin tvö, meðal annars fyrir árás. Lögmaður hans segir að hann iðrist gjörða sinna og sjái eftir þeim skaða sem hann hafi valdið þolendum innbrotanna.