Eitt merkasta kennileiti heims, Kínamúrinn, sem er á lista yfir sjö undur veraldar, lítur nú öðruvísi út þökk sé tveimur verktökum.

Vinna við múrinn hófst á 7. öld fyrir Krist og vissulega veðrast mannvirki í áranna, tala nú ekki um aldanna rás, þrátt fyrir að allt sé gert til að varðveita þau sem best.

Byggingarstarfsmenn í miðhluta Shanxi héraðs sáu sér leik á borði þar sem lítið skarð var komið í múrinn, að breikka skarðið enn meira svo þeir kæmust í gegn með gröfuna sína, enda mun styttri leið fram og tilbaka á vinnusvæðið, svona að þeirra mati. 

Lögregluyfirvöldum var ekki skemmt og voru tveir handteknir, 38 ára karlmaður og 55 ára kona, sem eru í haldi á meðan málið er rannsakað.

Byggingarverkamennirnir tveir voru að vinna nálægt skemmda svæðinu, það er við 32 múrinn. Lögreglan í norðvesturhluta Youyu-sýslu greinir frá að tilkynnt hafi verið um „alvarlegar skemmdir“ í múrnum þann 24. ágúst. „Gröfur voru notaðar til að grafa upphaflegt skarð í stærra skarð, svo að grafan kæmist í gegnum skarðið, sem olli óafturkræfum skemmdum á múrnum og öryggi menningarminja.“

Kínamúrinn er á heimsminjaskrá UNESCO og er talinn eitt  af glæsilegustu verkfræðiverkum mannkyns. Múrinn er sögulegur og menningarlegur staður. Múrinn hefur hrunið víða á undanförnum árum, þó að minnstu leyti af völdum manna. Samkvæmt AFP fréttastofunni hafa um 30 prósent af Kínamúrnum horfið á undanförnum árum vegna loftslagsskilyrða og af mannavöldum.

Frægt varð í sumar þegar breskur ferðamaður framdi skemmdarverk á Colosseum í Róm á Ítalíu.

Sjá einnig: Ferðamaðurinn sem framdi skemmdarverk á ómetanlegri byggingu er fundinn