44 ára karlmaður hefur verið ákærður af saksóknara í Danmörku fyrir fjölda grófra kynferðisbrota. Maðurinn starfaði sem foringi innan dönsku skátahreyfingarinnar og er sakaður um að hafa nauðgað stúlkum allt niður í 10 ára aldur í ferðum á vegum skátahreyfingarinnar. Hann er einnig ákærður fyrir vörslu barnakláms.

Ekstra Bladet skýrir frá þessu og segir að maðurinn sé ákærður fyrir nauðganir, kynferðislegt ofbeldi af öðrum toga og blygðunarsemisbrot gegn fjórum 10 ára stúlkum. Er ofbeldið sagt hafa átt sér stað í skátaferðum, þar sem börnin gistu, á Sjálandi og Jótlandi árið 2017.

Maðurinn er einnig ákærður fyrir að hafa verið með mikið magn af barnaklámi í fórum sínum 2021.

Málið verður tekið fyrir hjá undirrétti í Glostrup í vikunni.

Saksóknari krefst þyngri refsingar yfir manninum en venjulega er gert í málum af þessu tagi þar sem stúlkurnar hafi verið í hans umsjá og hafi hann borið ábyrgð á kennslu þeirra og uppeldi á meðan á skátaferðunum stóð.