Á aðeins einum mánuði létust 4.500 manns í Bergamo. Þegar faraldurinn var í hámarki lágu rúmlega 500 alvarlega veikir sjúklingar á sjúkrahúsinu í Bergamo, þar af margir á göngunum.
Skýringa hefur verið leitað á af hverju Bergamo-hérað var miðpunktur faraldursins á Ítalíu. Margt hefur verið skoðað í þessu sambandi, allt frá hreinlæti til þess hvernig fólk notar almenningssamgöngur.
En nú hafa þessir þættir verið hreinsaðir af öllum grun og sökudólgurinn virðist vera 50.000 ára gamlir atburðir. Rannsókn vísindamanna við Mario Negri stofnunina í Milano hefur leitt í ljós að íbúar á svæðinu bera margir hverjir gen úr Neanderdalsmönnum og það eru þau sem eru talin eiga sök á því hve illa fór í Bergamo.
Vísindamennirnir kynntu niðurstöðu rannsóknar sinnar nýlega á fréttamannafundi. Þar kom fram að rannsókn þeirra á 9.773 íbúum á svæðinu hafi leitt í ljós að skýringuna á þessum mikla fjölda dauðsfalla á svæðinu megi rekja til þriggja gena frá Neanderdalsmönnum en þau eru í litningi 3.
Eitt sinn veittu tvö af þessum genum Neanderdalsmönnum vernd gegn sýkingum en nú valda þau of sterkum ónæmisviðbrögðum sem gerir að verkum að þeir, sem eru með þessi gen, eru í hættu á að veikjast meira af völdum sjúkdóma en aðrir.
Þriðja genið gerir að verkum að hættan á að fá lungnabólgu er miklu meiri en hjá þeim sem eru ekki með þetta gen.
Samkvæmt niðurstöðum rannsóknarinnar þá gera þessi gen það að verkum að fólk, sem smitast af kórónuveirunni, er í tvöfalt meiri hættu á að veikjast alvarlega af COVID-19 en þeir sem eru ekki með þessi gen.
Líkurnar á að enda á gjörgæslu eru þrisvar sinnum meiri hjá þeim sem eru með þessi gen að því er kemur fram í rannsókninni.
Giuseppe Remuzzi, aðalhöfundur rannsóknarinnar, telur að þessi fornu gen geti hafa kostað eina milljón mannslífa á heimsvísu hjá fólki án annarra áhættuþátta. Þetta þýðir að niðurstöður rannsóknarinnar eiga ekki aðeins við um Bergamo.
