Flest vitum við að Íslendingar koma með einum eða öðrum hætti héðan frá Íslandi. Færri vita að Íslendingar finnast líka í smáþorpum í Nígeríu og hafa þar háð blóðugt stríð við Grænlendinga. Þar kemur þó Ísland ekkert við sögu enda er hér um að ræða vígvædd bræðralög innfæddra sem yfirvöld flokka sem sértrúarsöfnuð, enda bræðralögin þekkt fyrir að leggja stund á vúdú.

Þessi bræðralög ganga undir ýmsum nöfnum. Íslendingar heitir eitt, eins og áður segir, sem og Grænlendingar, en eins eru fleiri sem kalla sig Víkinga og svona mætti lengi áfram telja. Íslendingar komust þó nýlega í fréttirnar þar úti eftir að hópurinn handsamaði háttsettan lögreglumann og afhöfðaði. Lögreglumaðurinn, Bako Agbashim, lenti í klóm Íslendinganna þegar hann fór með teymi sínu inn í skóg nokkurn til að freista þess að hafa hendur í hári glæpamanna sem væru þar í felum. Þar lenti hópurinn í umsátri en samkvæmt lögreglunni í Nígeríu barðist Bako hetjulega á meðan undirmenn hans hörfuðu. Hlaut hann af þeirri viðleitni banvæna áverka. Íslendingarnir hafi svo tekið líkamsleifar hans og vanhelgað líkið.

Samkvæmt heimildum miðilsins Businessday hafði glæpahópurinn fengið ábendingu um að von væri á Bako og liði hans. Þe

Myndskeið hefur gengið um samfélagsmiðla þar sem sjá má að lík Bako var afhöfðað, en í bakgrunni myndskeiðsins heyrist hvar einhver hæðist að hinum látna fyrir að hafa lagt í stríð við Íslendinga.

Þrátt fyrir að margir glæpahópar séu starfræktir á svipuðum slóðum þá teljast Íslendingar og Grænlendingar með þeim stærri og hafa átt í blóðugu stríði áratugum saman.

Sumir eru drepnir með sveðjum aðrir með byssum og sprengjum. En mörg drápin eru framkvæmd með frumstæðari aðferðum. Mjög algengt er að lík finnist með kramið höfuð eftir stóra steina eða steypuhnullunga. Kirkjur og samkomuhús lítilla bæja eru staðir sem verða iðulega skotmörk hreyfinganna og oft á sér stað vanhelgun tengd vúdú.

Þrátt fyrir að margar skæruliðahreyfingar og vúdú-gengi starfi á svæðinu hafa Íslendingarnir og Grænlendingarnir ávallt litið á sig sem höfuðandstæðinga. Stríðið milli þeirra hefur nú staðið yfir í mörg ár og ekki sér fyrir endann á því. Engar tölur eru til um heildarmannfall í átökunum.

Nánar má lesa um stríð Íslendinga og Grænlendinga hér.