Lloyd Austin, varnarmálaráðherra Bandaríkjanna, segir skort á samskiptum við Kína geta orsakað atvik sem bæði ríkin geti fljótt misst stjórn á.
Í frétt CNN kemur fram að Austin hafi sagt á fréttamannafundi með varnarmálaráðherra Japan, Yasukazu Hamada, að það sé mikilvægt að ríki sem búi yfir miklum hernaðarmætti eigi í góðum samskiptum til að koma í veg fyrir atvik sem geti auðveldlega orðið óviðráðanleg.
Hann segir mikið áhyggjuefni að Kína skuli ögra Bandaríkjunum og bandamönnum þeirra með því að hafa afskipti af flugvélum og skipum á alþjóðlegum hafsvæðum og lofthelgi. Sagðisy ráðherrann fagna öllum tækifærum til að eiga í samskiptum við kínverska ráðamenn.
Varnarmálaráðuneyti Bandaríkjanna segir að Kínverjar hafi hafnað því að Austin og varnarmálaráðherra Kína, Li Shangfu, myndu funda. Varnarmálaráðuneyti Kína kennir hins vegar Bandaríkjunum alfarið um þá spennu sem ríkir milli herafla ríkjanna.
Ummæli Austin bætast við þau sem Xi Jinping, forseti Kína, viðhafði nýlega um að æðstu embættismenn á sviði öryggismála ættu að vera viðbúnir hinu versta.
