Það var síðasta föstudag sem stjörnufræðingar skýrðu frá því að þeir hefðu uppgötvað eldhnött, sem er 100 sinnum stærri en jörðin og miklu bjartari en sólin okkar, í geimnum.
Þessi eldhnöttur hefur fengið nafnið AT20211lwx. Hann varð til við gríðarlega sprengingu, þá öflugustu sem stjörnufræðingar hafa orðið vitni að.
Eldhnötturinn byrjaði að brenna fyrir um þremur árum og það var tilviljun sem réði því að hann uppgötvaðist að sögn Philip Wiseman, stjarneðlisfræðings við háskólann í Southampton.
„Þetta er eitthvað sem við höfum aldrei séð áður og kom bara upp úr þurru,“ sagði hann.
Sprengingin átti sér ekki stað í næsta nágrenni jarðarinnar því hún varð í um 8 milljarða ljósára fjarlægð að því er segir í rannsókninni sem hefur verið birt í Monthly Notices of the Royal Astronomical Society.
Aldrei fyrr hafa ljósblossar sést í svona mikilli fjarlægð og segja stjörnufræðingar það sanna að hún hljóti að hafa verið gríðarlega öflug.
Líklegasta skýringin á henni er að gríðarlegt gasský, um 5.000 sinnum stærra en sólin, sé við það að hverfa inn í svarthol.
