Aftonbladet greinir frá því að fyrrverandi háttsettur stjórnmálamaður hafi verið dæmdur fyrir skemmdarverk eftir að hafa skrifað eftirfarandi orð á vegg þjóðminjasafnsins í Stokkhólmi, með málningu úr úðabrúsa:

„Hitlers kuksugare.“

Er þá viðkomandi að vísa til einhvers sem sýgur liminn á Adolf Hitler.

Aftonbladet nafngreinir ekki stjórnmálamanninn fyrrverandi en segir hann hafa gegnt háum stöðum í bæði í Svíþjóð og á vettvangi Evrópusambandsins.

Maðurinn var handtekinn síðastliðinn þriðjudag eftir að öryggisverðir sáu til hans í eftirlitsmyndavélum og hringdu á lögregluna. Maðurinn reyndi að flýja af vettvangi eftir að hann hafði lokið við að skrifa umrædd orð á vegginn en án árangurs. Hann sletti einnig málningu á safnið.

Maðurinn var með bakpoka á sér og í honum fundust málningarburstar og rauð málning. Hann var einnig með málningarbletti á líkamanum og var um að ræða sömu málningu og slett hafði verið á vegg þjóðminjasafnsins.

Á leiðinni á lögreglustöðina tjáði maðurinn lögreglumönnum að sænska ríkið sygi liminn á Adolf Hitler.

Hann játaði verknaðinn við yfirheyrslu og sagðist mjög reiður út í Svíþjóð og þjóðminjasafnið væri tákn fyrir landið.

Hann sagðist jafnframt hafa skrifað þessi orð af því að Svíþjóð hefði þjónað alræðisstjórn í síðari heimsstyrjöldinni. Stjórnmálamaðurinn fyrrverandi bætti því við að einhver hefði hlerað síma hans og lesið tölvupósta hans síðustu 20 ár. Þetta væru verk alræðisstjórnar. Maðurinn var einnig með talsvert af reiðufé á sér en hann sagðist gera það af því hann væri hræddur um að einhver myndi loka bankareikningnum hans.

Það tók ekki langan tíma að afgreiða málið. Tveimur dögum eftir handtökuna fékk maðurinn skilorðsbundinn dóm og var þar að auki dæmdur til að greiða skaðabætur sem nota á til að kosta hreinsun á þjóðminjasafninu og kirkju sem maðurinn skrifaði sömu orð á.