Víetnamskur maður á fertugsaldri var búinn að vera að drepast úr höfuðverk í fimm mánuði þegar hann leitaði sér loks læknishjálpar í borginni Dong Hoi þann 25. nóvember síðastliðinn. Óhætt er að segja að ástæðan fyrir verkjunum hafi komið manninum og læknum spítalans í opna skjöldu. Maðurinn reyndist vera í bráðri lífshættu vegna matarprjóna sem voru fastir í höfuðkúpu hans og stuðluðu að óbærilegum þrýstingi á heila hans.

New York Post greinir frá málinu en við nánari rannsóknir lækna kom í ljós að matarprjónarnir virtust hafa farið upp í gegnum nef sjúklingsins af miklum krafti og þaðan inn í heila hans. Sjúklingurinn kom að fjöllum en eina mögulega útskýring hans var sú að fimm mánuðum fyrr hafði hann hrunið í það, orðið blindfullur og lent í handalögmálum á næturlífinu. Hann mundi eiginlega ekkert eftir kvöldinu en rámaði í að hafa verið sleginn með einhverjum ótilgreindum hlut í andlitið.

Hann hafði verið skoðaður af lækni á slysavarðstofu í kjölfarið en ekkert óvenjulegt fundist.

Þetta óvenjulega mál hlaut farsælan endi því sjúklingurinn minnislausi undirgekkst skurðaðgerð þar sem matarprjónarnir voru fjarlægðir. Hann er nú að jafna sig á sjúkrahúsi og bíður þess að vera útskrifaður en ekki er talið að hann hafi orðið fyrir varanlegum skaða.