Frost var sakfelldur fyrir kynferðisbrot gegn ellefu börnum en brotin framdi hann meðan hann starfaði sem sundkennari í Sydney. Brotin sem Frost var dæmdur fyrir voru alls 43 talsins og þau framdi hann yfir tíu ára tímabil. Fórnarlömbin voru allt niður í tíu ára gömul.
Frost var handtekinn fyrst fyrir fjórum árum en dómur féll í málinu loks í þessari viku eftir viðamikla rannsókn og langa málsmeðferð fyrir dómstólum.
Við dómsuppkvaðninguna sagði dómarinn í málinu, Sarah Huggett, að Frost hafi ekki sýnt neina iðrun.
Nýjasta brotið sem Frost var dæmdur fyrir var framið árið 2010 en Sarah sagði það litlu skipta. Það ár var sundskólanum sem hann starfaði fyrir lokað og telur dómarinn að hann hefði haldið brotum sínum áfram ef hann hefði starfað áfram með börnum.
Frost komst í úrslit í fyrstu þáttaröð MasterChef Australia árið 2009. Hannreyndi fyrir sér í veitingahúsabransanum í Ástralíu en það ævintýri fór í vaskinn og endaði með persónulegu gjaldþroti hans árið 2016.
