Wagner-hópurinn hefur komið mikið við sögu í stríðinu í Úkraínu en hann berst við hlið rússneska hersins. Þetta er rússneskur málaliðahópur í eigu Yevgeny Prigozhin, sem hefur oft verið nefndur „Kokkur-Pútíns“. Hafa rússnesk yfirvöld notað hópinn víða um heim í gegnum árin þegar þau hafa viljað ná einhverjum markmiðum sem þjóna hagsmunum Rússa. Er hópurinn orðlagður fyrir grimmd og miskunnarleysi og aftökur og nauðganir.

Nýlega reyndi hópurinn að auglýsa eftir nýjum málaliðum í gegnum klámsíðuna Pornhub, en þar voru menn hvattir til að „hætta að fróa“ sér og koma heldur á fremstu víglínu.

Pornhub hefur þó líklega ekki litist á þessa auglýsingu því hún var fljótlega tekin þaðan úr birtingu.

Kyiv Post greinir frá málinu en þar segir að í auglýsinguni hafi verið sagt: „Við erum fokking besta einkarekna málaliðafyrirtækið í heiminum, hættið að fróa ykkur og komið á víglínuna.“

Annar texti sem hafi einnig verið birtur hafi hvatt menn til að taka sér „hinn hólkinn í hönd“ og er þar vísað til þess að menn ættu að leggja frá sér hólkinn sem er limur þeirra og taka frekar upp byssuhólk.

Kokkur-Pútíns, Prigozhin, sagði nýlega að hann ætli að umbreyta ímynd Wagner-hópsins og koma honum á framfæri sem herliði með hugsjónir. Hann virðist vera aðdáandi þess að nota nýstárlegar aðferðir til að afla sér nýrra málaliða.