Það er í lagi að vera ófélagslyndur og jafnvel leiðinlegur í vinnunni. Þetta er niðurstaða í máli sem starfsmaður ráðgjafafyrirtækis í París höfðaði gegn vinnuveitanda sínum.

Maðurinn var rekinn úr starfi því hann þótti ekki nógu skemmtilegur. Maðurinn var ráðinn til starfa hjá fyrirtækinu Cubik Partners 2011 sem aðalráðgjafi. Tveimur árum síðar var hann gerður að forstjóra.

En 2015 var honum sagt upp störfum þegar hann neitaði að taka þátt í viðburðum á vegum fyrirtækisins. Þótti honum þessir viðburðir vera bæði niðurlægjandi og uppáþrengjandi. Meðal þessara viðburða voru ráðstefnur og samkomur um helgar. Hann sagði að á þessum ráðstefnum og samkomum væri óhóflega áfengisneysla og lauslæti áberandi. Le Figaro skýrir frá þessu.

Skilgreining fyrirtækisins á hvað fælist í að vera „skemmtilegur og fagmannlegur“ var að starfsfólk tæki þátt í kynlífsleikjum, gæfi vinnufélögum gróf viðurnefni og skreytti veggi með undarlegum myndum. Í helgarferð var maðurinn neyddur til að deila rúmi með starfsfélaga sínum.

Í niðurstöðu dómstólsins er vísað til tjáningarfrelsis mannsins og því slegið föstu að það séu „grundvallarréttindi“ að mega neita að taka þátt í félagslífi. Af þeim sökum var uppsögnin dæmd ólögleg.

Maðurinn krafðist sem nemur um 70 milljóna íslenskra króna í bætur en dómurinn dæmdi honum sem svarar til um 440.000 íslenskra króna í bætur.