Fornleifafræðingar frá áströlskum háskólum og indónesískum stofnunum fundu beinagrind ungs manns frá Borneo. Vinstri fótleggur hans hafði verið tekinn af honum fyrir 31.000 árum, þegar hann var barn. Þetta er 24.000 árum fyrr en elsta þekkta dæmið til þessa.
Rannsóknin hefur verið birt í vísindaritinu Nature.
Með ýmsum aldursgreiningaraðferðum var staðfest að ungi maðurinn var grafinn fyrir 31.000 árum. Þetta er því elsta þekkta gröfin sem fundist hefur í Suðaustur-asíu.
Vísindamennirnir segja að rannsóknir á beinagrindinni sýni að neðsti hluti vinstri fótleggsins hafi verið fjarlægður með skurðaðgerð. Það hvernig beinvefurinn hafi breyst með tímanum passi við velheppnaða aflimun sem sýking hafi ekki komist í og því hafi sjúklingurinn lifað aðgerðina af.
Þeir segja að flest bendi til að „skurðlæknirinn eða skurðlæknarnir hafi líklega skilið þörfina fyrir meðhöndlun“. Þeir segja að þetta bendi einnig til að læknisfræðileg kunnátta forfeðra okkar hafi verið miklu meiri en talið hefur verið fram að þessu.
