Þeir sem hrjóta eru hugsanlega í aukinni hættu á að fá krabbamein. Þetta eru niðurstöður nýrrar rannsóknar. Í henni kemur fram að þetta sé ekki vegna þess að þeir sem hrjóta eru líklegri til að vera feitir, reykja eða glíma við einhver heilbrigðisvandamál.

Daily Mail segir að sænskir vísindamenn telji að þetta tengist þeim súrefnisskorti sem þeir sem hrjóta verða fyrir að næturlagi.

Aðrar rannsóknir hafa sýnt fram á tengsl kæfisvefns og minni heilastarfsemi og blóðtappa. Milljónir manna um allan heim þjást af kæfisvefni en hann hefur í för með sér að öndunin raskast. Yfirleitt kemur þetta fram sem hrotur.

Þær eru pirrandi og fara oft illa í maka viðkomandi. En það er ekki alltaf kæfisvefn sem veldur þeim.

Vísindamennirnir kynntu rannsókn sína á læknaráðstefnu í Barcelona. Þeir fylgdust með tæplega 4.200 sjúklingum sem þjáðust af kæfisvefni. Helmingur þeirra greindist með krabbamein á síðustu fimm árum.

Dr Andreas Palm, hjá Uppsalaháskóla, stýrði rannsókninni sem beindist að því að mæla hversu alvarlegur kæfisvefninn var hjá þátttakendunum. Það var gert með tveimur prófum. Annað mældi fjölda öndunartruflana þegar fólkið svaf en í hinu var fylgst með hversu oft súrefnismagnið í blóði þátttakendanna lækkaði um 3% í minnst 10 sekúndur á hverri klukkustund.

Rannsóknin leiddi í ljós að krabbameinssjúklingar urðu almennt fyrir meiri svefntruflunum.

Palm benti á að nú þegar sé vitað að sjúklingar með kæfisvefn séu í aukinni hættu á að fá krabbamein en ekki sé vitað hvort það tengist svefntruflununum eða áhættuþáttum á borð við offitu, hjarta- og æðakerfinu eða lífsstílsþáttum. Hann sagði að niðurstöður nýju rannsóknarinnar bendi til að súrefnisskortur í svefni tengist krabbameini.

En rannsóknin ein og sér sannar þetta ekki og frekari og ítarlegri rannsókna er þörf.