Ný rannsókn frá Háskólanum í Konstanz bendir til þess að köngulær dreymi. Daniela Rössler beitti myndavélum sem nema innrautt ljós á sofandi köngulær og sá að köngulærnar kipptust til sem hún trúir að bendi til þess að köngulær upplifi svokallaðan REM-svefn, einnig kallaður draumsvefn. Wall Street Journal greindi frá.
„Þegar ég sá þessi kækjóttu andlit trúði ég því varla því þetta leit alveg eins út og þegar ketti eða hunda dreymir,“ sagði Rössler sem vann að rannsókninni sem birtist í gær í Proceeding of the National Academy of Sciences. Slíkt atferli hefur sést í hryggdýrum en aldrei í áttfætlum. Paul Shaw, prófessor í taugavísindum við læknisfræðideild Washington-háskóla sagði að niðurstöðurnar „bæti við fjölda og tegundir dýra sem upplifa þetta mannlega fyrirbæri“ og að þær „kollvelti hugmyndum okkar um hvenær draumsvefn þróaðist.“ Rétt eins og mannfólk virðast köngulærnar fara í draumsvefn í lotum á um 20 mínútna fresti.
„Ég held að þær sé að dreyma. En að sanna það með vísindalegri aðferð er önnur saga,“ sagði Rössler. Hún tók fram hve erfitt það er að mæla heilavirkni köngulóa vegna þess hve smár heili þeirra er. En framtíðarrannsóknir munu bera saman augnhreyfingar köngulóa í draumsvefninum meinta og á vökutíma. Ef sama heilavirknimunstur er mælt þegar könguló nær í flugu og mælt í draumsvefninum má ganga út frá því að köngulóna dreymi um það, sagði Rössler.
