Sky News skýrir frá þessu. Fram kemur að fólk sem hafi smitast af COVID-19 sé í meiri hættu á að þróa með sér taugasjúkdóma og geðræn vandamál á borð við geðtruflun, elliglöp og heilaþoku í allt að tvö ár eftir smit. Hugsanlega er hættan meiri í lengri tíma en rannsókninni lauk þegar fylgst hafði verið með sjúklingunum í tvö ár eftir smit.
Fullorðnir eru einnig í aukinni hættu á að glíma við kvíða og þunglyndi en það dregur þó úr því innan tveggja mánaða frá veikindunum.
Rannsóknin byggðist á 1,25 milljónum smitaðra einstaklinga. Hún leiddi einnig í ljós að börn, sem smitast af COVID-19, eru líklegri til að greinast með sjúkdóma á borð við flog og geðtruflanir. Líkurnar á að þau greinist eru þó í flestum tilfellum minni en hjá fullorðnum.
Fullorðnir, 64 ára og yngri, voru í meiri hættu á að glíma við heilaþoku og vöðvaverki en þeir sem höfðu fengið aðra öndunarfærasjúkdóma.
Hjá fullorðnum, 65 ára og eldri, voru meiri líkur á að fólk fengi heilaþoku, elliglöp og geðtruflanir en þeir sem höfðu fengið aðra öndunarfærasjúkdóma.
Rannsóknin leiddi einnig í ljós að Deltaafbrigði kórónuveirunnar kom meira við sögu hvað varðar aðra sjúkdóma og veikindi en Alphaafbrigðið. Hvað varðar Ómíkron þá voru líkurnar svipaðar og með Deltaafbrigðið.
Rannsóknin hefur verið birt í vísindaritinu The Lancet Psychiatry.
Paul Harrison, prófessor við Oxfordháskóla og aðalhöfundur rannsóknarinnar, segir að þrátt fyrir að tölurnar séu ekki lágar þá séu þær ekki stórar og það verði að setja þær í samhengi við hugsanlegt aukið álag á heilann og andlega heilsu almennings vegna heimsfaraldursins.
