Holly Dance, móðir Archie Battersbee, fullyrðir að 82 börn hafi látist vegna samfélagsmiðlaleiks – The BlackOut Challenge – sem drap son hennar.

Sjá einnig:  Áfrýjun foreldra Archie Battersbee synjað – Verður tekinn úr sambandi á morgun

Hinn 12 ára gamli Archie fannst meðvitundarlaus á heimili móður sinnar í byrjun apríl á þessu ári. Talið er að hann hafi tekið þátt í umræddum leik, sem gengur út á það að þátttakendur þrengja að háls sínum, með snæri eða einhverju viðlíka, og reyna að missa meðvitund í stutta stund.

Archie var úrskurðaður heiladaður og í kjölfarið hófst fjölmiðlastormur sem snerist um kröfu lækna að taka öndunarvél drengsins úr sambandi og aðstandenda hans sem vildu bíða og vonast eftir framförum. Að endingu höfðu læknarnir betur eftir fjölmörg dómsmál og lést Archie þann 6. ágúst síðastliðinn – fjórum mánuðum eftir slysið hræðilega.

Sjá einnig: Segja að dauði Archie Battersbee hafi verið „villimannslegur“

Foreldrum Archie er umhugað um að önnur börn hljóti ekki nöturleg örlög sonar þeirra. Í viðtali við Mirror fullyrðir móðir hans, eins og áður segir, að 82 börn hafi þegar látist vegna leiksins og skorar á samfélagsmiðla á borð við Facebook og Tiktok að bregðast við og hefta útbreiðsluna. Segir hún að sjúkt fullorðið fólk sé að halda þessum leikjum að áhrifagjörnum börnum.

Hún hafi séð myndband af manni á fertugsaldri sem sýnir börnum út á hvað leikurinn gangi og hvetji þau til að prófa. Slík hegðun eigi að vera refsiverð og breyta þurfi löggjöf svo hægt sé að sækja fólk til saka fyrir slíkt.